'आशा'नंतर महिन्याभरातच रिंकू राजगुरूची पुन्हा थिएटरमध्ये एन्ट्री, अशोक मामांसोबत करणार स्क्रिन शेअर

अभिनेत्री रिंकू राजगुरूचा 'आशा' हा सिनेमा नुकताच रिलीज झाला आहे. या सिनेमाला चांगला प्रतिसाद मिळत आहे. रिंकू एका वेगळ्या भूमिकेत प्रेक्षकांच्या भेटीला आली आहे. सिनेमात रिंकूनं आशा सेविकांची भूमिका साकारली आहे.

'आशा' सिनेमा रिलीज झाल्याच्या एका महिन्यात रिंकू पुन्हा एकदा थिएटरमध्ये दिसणार आहे. 2026 वर्षात रिंकू राजगुरूचा नवा सिनेमा थिएटरमध्ये येतोय. या सिनेमात रिंकू राजगुरू महाराष्ट्रभूषण अभिनेते अशोक सराफ यांच्याबरोबर स्क्रिन शेअर करणार आहे. 

मराठीतील एव्हरग्रीन सिनेमांपैकी एक सिनेमा म्हणजे साडे माडे तीन. तब्बल एकोणवीस वर्षांनी साडे माडे तीन या सिनेमाचा सीक्वेल प्रेक्षकांच्या भेटीला येत आहे.  या सिनेमात अभिनेत्री रिंकू राजगुरू महत्त्वाच्या भूमिकेत आहे.  

 प्रेक्षकांच्या मनावर अधिराज्य गाजवणारे 'कुरळे ब्रदर्स' पुन्हा एकदा मोठ्या पडद्यावर धमाल करण्यासाठी सज्ज झाले आहेत. 'पुन्हा एकदा साडे माडे तीन' या बहुप्रतिक्षित सिनेमाचं नवं पोस्टर नुकतंच सोशल मीडियावर झळकलं आहे.

पोस्टर पाहाताच एक गोष्ट स्पष्ट होते ती, या वेळी गोंधळ डबल आहे… आणि धमालही डबल! साध्या परिस्थितीतून मोठा गोंधळ निर्माण करणारी ‘साडे माडे तीन’ची ओळख या नव्या पोस्टरमधूनही ठळकपणे जाणवते आणि त्यामुळेच प्रेक्षकांची उत्सुकता अधिकच वाढली आहे.

आता तब्बल एकोणीस वर्षांनंतर, त्याच आठवणींना उजाळा देत आणि आजच्या काळाशी जुळवून घेत 'पुन्हा एकदा साडे माडे तीन' प्रेक्षकांच्या भेटीला येत असल्यामुळे उत्सुकता शिगेला पोहोचली आहे. अंकुश चौधरी यांच्यासारख्या अनुभवी दिग्दर्शकाच्या हातात ही कथा पुन्हा एकदा साकारली जात असल्यामुळे, या वेळी हास्याबरोबरच कथेतली पकडही तितकीच भक्कम असणार यांचा अंदाज येतोय.

अंकुश चौधरीची कथा, संदीप दंडवते यांची पटकथा आणि संवाद आहे. सिनेमात अशोक सराफ, भरत जाधव, मकरंद अनासपुरे, सिद्धार्थ जाधव, रिंकू राजगुरू, संकेत पाठक, संजय नार्वेकर आणि समृद्धी केळकर यांच्या प्रमुख भूमिका आहेत. चित्रपटाचे छायाचित्रण प्रसिद्ध छायाचित्रकार संजय जाधव यांनी केले आहे. पुन्हा साडे माडे तीन हा सिनेमा 30 जानेवारी 2026 रोजी रिलीज होणार आहे.