निधनाआधी सचिन यांना शेवटचा Message, सतीश शाह यांच्याशी काय बोलणं झालं? पिळगांवकरांनी दाखवला मेसेज

'साराभाई वर्सेस साराभाई' मालिका गाजवणारे बॉलिवूडचे दिग्गज अभिनेते सतीश शाह यांचं 25 ऑक्टोबर रोजी निधन झालं.

किडन संबंधित आजाराशी ते लढत होते पण त्यांची ही झुंज अपयशी ठरली. सतीश शाह यांच्या निधनाच्या बातमीने इंडस्ट्री हळहळली.

दरम्यान सतीश शाह यांच्याबरोबर मी शेवटचं बोललो होतो असं ज्येष्ठ अभिनेते सचिन पिळगांवकर यांनी म्हटलं. सचिन पिळगांवकर यांनी न्यूज18शी बोलताना ही माहिती दिली होती.

त्यानंतर सचिन यांनी सोशल मीडियावर सतीश शाह यांच्याशी झालेल्या शेवटचा मेसेज पोस्ट केला आहे. मित्र गमावल्याचं दु:ख त्यांनी व्यक्त केलं.

सतीश शाह यांच्या निधनाच्या एक दिवसानंतर सचिन पिळगांवकर यांनी फेसबुकवर एक पोस्ट लिहिली आहे. "हा माझा मित्र सतीश शाह याने काल दुपारी 12:56 वाजता पाठवलेला शेवटचा मेसेज होता. त्याच्या आत्म्यास शांती लाभो."

शेवटचा मेसेज देखील सचिन पिळगांवकर यांनी दाखवला. त्यात असं लिहिलंय, "माझ्या वयामुळे लोक मला अनेकदा प्रौढ समजतात."

सचिन यांनी न्यूज18शी बोलताना सांगितलं, "सुप्रिया 3 दिवसांपूर्वी सतीश आणि मधुला भेटायला गेली होती. मी शूटिंगमध्ये बिझी होतो त्यामुळे जाऊ शकलो नाही. त्यांनी तिथे गाणी लावली होती. त्यावर सुप्रिया आणि मधुने डान्सही केला."

सचिन यांनी पुढे सांगितलं, "आम्ही दोघे सतत मेसेजवर बोलत होतो. खरं सांगायचं तर आज दुपारी 12:56ला मला त्यांचा एक मेसेज आला. त्याच्या जाण्याने इंडस्ट्रीचं मोठं नुकसान झालं आहेच पण ही माझ्यासाठीही खूप मोठी वैयक्तिक हानी आहे."