अमिताभ बच्चनसोबत डेब्यू, व्हिलन बनून दाखवली झलक; हिरो बनताच अभिनेत्यानं हलवलं बॉक्स ऑफिस

बॉलिवूडमध्ये असे फार कमी कलाकार आहेत ज्यांनी आपल्या कारकिर्दीची सुरुवात खलनायक म्हणून केली आणि सुपरस्टार म्हणून उदयास आले. अमिताभ बच्चन यांच्याबरोबर डेब्यू केलेला असाच एक अभिनेता. ज्याने आधी व्हिलन आणि त्यानंतर हिरो बनून बॉक्स ऑफिस गाजवलं.

1969 हे वर्ष बॉलिवूड चित्रपटांच्या इतिहासात एक महत्त्वाचा टप्पा ठरलं. ज्याने पुढील अनेक दशकांसाठी दोन तगड्या कलाकारांना जन्म दिला.  ही एका अशा अभिनेत्याची कहाणी आहे ज्याला हिरो व्हायचं होतं पण त्याने आपल्या कारकिर्दीची सुरुवात एका खलनायकाच्या भूमिकेतून केली.

आपण बोलत आहोत ते अभिनेते म्हणजे शत्रुघ्न सिन्हा.  शत्रुघ्न सिन्हा यांच्या  प्रवासाबद्दल जाणून घेऊया, ज्याने खलनायकापासून सुपरस्टारपर्यंतचे संपूर्ण समीकरणच बदलून टाकलं.

अमिताभ बच्चन आणि शत्रुघ्न सिन्हा यांनी जवळपास एकाच वेळी चित्रपटसृष्टीत प्रवेश केला. एकीकडे अमिताभ आपल्या उंच शरीरयष्टी आणि भारदस्त आवाजाने स्वतःची ओळख निर्माण केली होती.  तर दुसरीकडे शत्रुघ्न सिन्हा आपल्या दमदार आवाजाने आणि चेहऱ्यावरील व्रणांनी दिग्दर्शकांना प्रभावित करत होते. 

70 च्या दशकाच्या सुरुवातीला शत्रुघ्न सिन्हा यांनी खलनायक म्हणून ओळख निर्माण केली.  त्यांच्यापुढे मोठे अभिनेतेही फिके पडले. नायकापेक्षा खलनायकाची वाट प्रेक्षक पाहायचे. 'मेरे अपने'मधील 'छेनू'ची भूमिका असो किंवा 'रामपूर का लक्ष्मण'मधील खलनायकाची भूमिका असो शत्रुघ्न यांनी हे सिद्ध केले की खलनायक केवळ लोकांना घाबरवण्यासाठी नसतो, तर तो प्रेक्षकांची मने जिंकण्यासाठीही असतो. 

बॉलिवूडमध्ये लोकांना खलनायकाला नायक म्हणून पाहणे दुर्मिळ आहे. शत्रुघ्न सिन्हा यांनी हा गैरसमज मोडून काढला. जेव्हा सुभाष घई यांनी 1976 मध्ये 'कालीचरण' हा आपला पहिला चित्रपट बनवला. तेव्हा त्यांनी शत्रुघ्न सिन्हा यांना कास्ट केले. हा एक मोठा धोका होता, कारण एका प्रसिद्ध खलनायकाला लोक नायक म्हणून स्वीकारतील की नाही याची खात्री नव्हती. 'कालीचरण' प्रदर्शित झाला आणि बॉक्स ऑफिसवर इतका प्रचंड यशस्वी ठरला की सर्वांनाच आश्चर्य वाटले. हा चित्रपट ब्लॉकबस्टर ठरला आणि शत्रुघ्न सिन्हा रातोरात सुपरस्टार बनले.

यानंतर 'विश्वनाथ', 'गौतम गोविंदा' आणि 'दोस्ताना' यांसारख्या चित्रपटांमधून शत्रुघ्न सिन्हा यांनी त्यांच्या अभिनयाची जादू सगळ्यांना दाखवून दिली. एके काळी त्यांना अमिताभ बच्चन यांचे सर्वात मोठे प्रतिस्पर्धी मानलं जात होतं. अमिताभ आणि शत्रुघ्न यांनी 'बॉम्बे टू गोवा', 'परवाना', 'काला पत्थर', 'शान' आणि 'दोस्ताना' यांसारख्या अनेक चित्रपटांमध्ये एकत्र काम केलं.

आपल्या 'एनीथिंग बट खामोश' या आत्मचरित्रात शत्रुघ्न सिन्हा यांनी हेदेखील सांगितलं आहे की, अमिताभ यांच्या वाढत्या लोकप्रियतेमुळे एकदा त्यांच्यात आणि अमिताभ यांच्यात तणाव निर्माण झाला होता. हा तो काळ होता जेव्हा चित्रपटाच्या पोस्टरवर कोणाचं नाव आधी येईल आणि कोणाचा संवाद सर्वात प्रभावी असेल यावरून जोरदार वादविवाद व्हायचे.