प्रसिद्ध स्टँडअप कॉमेडियनचा मोठा निर्णय, मंचावरच केली धक्कादायक घोषणा; चाहत्यांची झोपच उडाली

स्टँड-अप कॉमेडियन झाकीर खानने कॉमेडीपासून मोठा ब्रेक घेण्याचे जाहीर केले आहे. हैदराबादमध्ये झालेल्या त्याच्या लाईव्ह शोदरम्यान त्याने ही मोठी घोषणा केली आहे.

झाकीर खानचा एक व्हिडीओ सध्या सोशल मीडियावर व्हायरल होत आहे. चाहत्यांच्या गर्दीत तुडुंब भरलेल्या ऑडिटोरियममध्ये झाकीरने ब्रेक घेत असल्याचं जाहीर केलं आहे. त्याच्या या निर्णयाने चाहते मात्र नाराज झाले आहेत.

हैदराबादमधील शोदरम्यान झाकीर खानने कॉमेडी शो करणं का थांबवत आहे याचं कारण सांगितलं. भावूक होत झाकीर खान म्हणतोय,"हा तीन, चार किंवा पाच वर्षांचा ब्रेक असेल, जेणेकरून मी माझ्या आरोग्याची काळजी घेऊ शकेन आणि काही वैयक्तिक गोष्टी नीट करू शकेन".

व्हिडीओमध्ये झाकीर म्हणतोय,"आजच्या या शोदरम्यान उपस्थित असलेला प्रत्येकजण माझ्या खूप जवळचा आहे. तुमची उपस्थिती माझ्यासाठी कल्पनेपलीकडची आहे आणि मी तुम्हा सर्वांचा कायम ऋणी राहीन. मनापासून धन्यवाद".

झाकीरची इंस्टा स्टोरी सध्या चाहत्यांचं लक्ष वेधून घेत आहे. झाकीरने बुर्ज खलिफाचा फोटो शेअर करत त्याने 20 जून हा कदाचित त्याचा शेवटचा परफॉर्मन्स असू शकतो, असे सूचित केले. त्याने लिहिले, “20 जूनपर्यंत प्रत्येक शो एक सोहळा आहे. यावेळी मी अनेक शहरांमध्ये येऊ शकणार नाही, त्यामुळे कृपया तुम्ही प्रयत्न करा आणि शो पाहायला या. तुमच्या प्रेमासाठी धन्यवाद.”

झाकीर याआधीही सततच्या प्रवासामुळे आरोग्यावर होणाऱ्या परिणामांविषयी बोलला आहे. 2025 मधील एका पोस्टमध्ये त्याने सांगितले होते की गेल्या दहा वर्षांपासून सलग टूर करत असल्याने आणि एका दिवसात अनेक शो केल्यामुळे त्याला ना पुरेशी झोप मिळते, ना वेळेवर जेवण करता येते, आणि याचा त्याच्या आरोग्यावर वाईट परिणाम होत आहे.

आपल्या तब्येतीबद्दल बोलताना झाकीर म्हणाला होता,"मी गेल्या दहा वर्षांपासून सलग टूर करत आहे. तुमच्याकडून मिळणारे प्रेम आणि आपुलकी मला खूप आनंद देते, पण इतका दीर्घकाळ टूर करणे आरोग्यासाठी योग्य नाही. सर्वांना खुश ठेवण्याचा प्रयत्न, दिवसाला दोन-तीन शो, झोपेची कमतरता, पहाटेच्या फ्लाइट्स आणि जेवणाची ठरावीक वेळ नसणे हे सगळं यामध्ये येतं. मी गेल्या एक वर्षापासून आजारी आहे, पण त्या वेळी काम करणं गरजेचं वाटल्यामुळे मला काम सुरू ठेवावं लागलं.” झाकीरच्या या घोषणेमुळे त्याचे चाहते सोशल मीडियावर निराशा व्यक्त करत आहेत.