तुम्हीही म्हणाल शहाणा का खुळा, MBA करून विकतोय बर्गर? पण आधी कमाईचा आकडा बघा!

पदवीयुक्त शिक्षणानंतर फूड इंडस्ट्रीमध्ये करिअर करण्याच्या उद्देशाने देशात अनेक ठिकाणी अभ्यासक्रमांच्या नावाने फूड जॉइंट्स नावारूपाला आले आहेत. खवय्यांना आवडणारी चव आणि नव्या रंगात सुरू झालेल्या या स्टार्टअपमध्ये नाशिकचाही महत्त्वाचा वाटा आहे. अशीच एक गोष्ट नाशिकच्या एमबीएचे शिक्षण पूर्ण करून एमबीए बर्गर सुरू करणाऱ्या मंदार कर्णिक या तरुणाची आहे.

मंदार याने आपले एमबीए शिक्षण पूर्ण केले आणि नवीनच नोकरी शोधण्याच्या मागे तो लागला. अनेक प्रयत्नांनंतर मंदार याला एका कंपनीत नोकरीदेखील लागली. परंतु त्याच वर्षात कोरोना महामारी आल्याने अनेक लोकांप्रमाणे मंदार याच्या सुद्धा हातातील जॉब गेला.

पहिलीच नोकरी आणि त्यातच काहीच महिन्यात हातातील नोकरी गेली. घरची परिस्थिती देखील सर्वसामान्य असल्याने आपले घर कसे चालणार या करता काहीतरी नवीन पर्याय शोधावा लागणार यामुळे मंदार याने नवीन सुरुवात करण्याचे ठरविले.

त्यानंतर मंदार याचे नोकरी करण्यापासून मन देखील उडाले. पुन्हा नोकरी लागली आणि त्यातच ती परत गेली तर काय होणार? या विचाराने मंदार याने व्यवसाय करण्याचे ठरविले आणि त्याने कॅफे सुरू करून व्यवसायात पाऊल ठेवले.

मंदार याने आपल्या जवळील मित्रांसोबत नाशिकमध्ये कॅफे सुरू केला. परिस्थिती बिकट असल्याने त्याने हा सर्व खर्च बँकेचे लोन घेऊन पूर्ण केला. कालांतराने मित्राने देखील हा बिझनेस सोडण्याचे त्याला सांगितले. त्या वेळेस कॅफेमधून बाहेर पडल्यानंतर हातात पैसे नसल्याने बँकेवाले घरी पैसे मागण्यासाठी येत असल्याचे मंदार सांगतो. बँकेचे पैसे भरण्यासाठी मंदार याने पुन्हा एका छोट्या कंपनीत नोकरी केली. परंतु नोकरीत मन लागतच नसल्याने त्याने स्वतःचा छोटा का होईना पण व्यवसाय करावा हेच ठरविले आणि 2023 मध्ये एमबीए बर्गरची स्थापना केली. आज मंदार या माध्यमातून महिन्याला 1 ते दीड लाखांचे उत्पन्न घेत असतो.

व्यवसाय सुरू करण्यासाठी अनेक लोकांकडे मंदार याने आपले हात पसरले होते. परंतु आज त्याचे हे यश पाहून सोडून गेलेले देखील त्याच्याकडे पुन्हा येत असल्याचे त्याने लोकल 18 सोबत बोलताना सांगितले.

तुम्हाला जर एमबीए बर्गर खायचे असल्यास नाशिकमधील निलेश सुपर मार्केट, सिरिन मेडोज, गंगापूर रोड परिसरात त्याची ही गाडी लागलेली असते. तसेच याच्याकडे फक्त 30 रुपयांपासून बर्गर मिळत असल्याने गर्दी देखील होत असते.