Women Health Tips : बाळंतपणानंतर महिला किती दिवसांनी शारीरिक संबंध ठेवू शकतात?

बदलती जीवनशैली, आहार आणि तणाव यांचाही महिलांच्या गर्भधारणेवर बराच परिणाम होतो. आजकाल अनेक महिलांना त्यांच्या गरोदरपणात समस्यांचा सामना करावा लागतो. यामुळे बऱ्याच महिलांना सिझेरियन पद्धतीने प्रसूती करावी लागली. या प्रक्रियेमध्ये महिलांना मोठ्या शस्त्रक्रियेला सामोरे जावे लागते.

सामान्य प्रसूतीदरम्यान बाळाला आणि आईला धोका असल्यास सिझेरियन प्रसूती केली जाते. बाळाची स्थिती बरोबर नसणे. म्हणजेच बाळाचे डोके वर आणि पाय खाली गर्भाशयात असणे, बाळाची स्थिती वाकडी असणे, बाळाची पोजिशन वारंवार बदलणे, अशा अनेक परिस्थितीमध्ये सिझेरियन केले जाते.

सामान्यतः सिझेरियन प्रसूतीनंतर (डिलिव्हरी) स्त्रीचे शरीर पूर्वपदावर येण्यास बराच वेळ लागतो. सिझेरियन प्रसूतीनंतर आईला अतिरिक्त काळजी घ्यावी लागते. यावेळी एक छोटीशी चूकही पुढे अनेक गुंतागुंत निर्माण करते. त्यामुळे सिझेरियन प्रसूतीनंतर अनेक गोष्टी न करण्याचा सल्ला डॉक्टर देतात.

सामान्य प्रसूती झालेली स्त्री दीड महिन्यात शारीरिकदृष्ट्या सक्रिय होते. परंतु सिझेरियन प्रसूतीनंतर जखम पूर्णपणे कोरडी होण्यासाठी आणि बरी होण्यासाठी 4-8 आठवडे लागतात. त्यामुळे स्त्रीला बरे होण्यासाठी थोडा जास्त वेळ लागतो.

तसेच, अनेक महिलांना सिझेरियननंतर शारीरिक संबंध कधी ठेवता येऊ शकतात हे माहीत नसते. सिझेरियन प्रसूतीनंतर काही आठवडे योनीमध्ये काहीही जाऊ नये. पण 6 आठवड्यांनंतरचा काळ हा महिलांना शारीरिक संबंधांसाठी योग्य मानला जातो. परंतु, काही स्महिलांना पूर्वस्थितीत येण्यासाठी यापेक्षाही जास्त वेळ लागू शकतो. त्यामुळे त्यांना काही काळ आराम करावा लागतो.

काही महिला उशिरा ठीक होतात. त्यामुळे सिझेरियननंतर शारीरिक संबंध प्रस्थापित करायचे असतील तर सर्वप्रथम डॉक्टरांचा सल्ला घेणे अत्यंत आवश्यक आहे. बाळंतपणानंतर गर्भाशयाचा आकार बदलतो. प्रसूतीनंतर गर्भाशयाला सामान्य आकारात येण्यासाठी थोडा वेळ लागतो आणि रक्तस्त्राव थांबायला वेळ लागतो. म्हणून, शरीर शारीरिक संपर्कास सक्षम आहे की नाही, हे जाणून घेण्यासाठी आपण डॉक्टरांचा सल्ला घ्यावा.

सिझेरियननंतर शारीरिक संबंध वेदनादायक असू शकतात. कारण या काळात स्त्री बाळाला स्तनपान करते. त्यामुळे योनीमार्ग खूप कोरडा होतो. नैसर्गिक स्नेहक नसल्यामुळे क्रिया कठीण होऊ शकते. डॉक्टरांच्या सल्ल्यानुसार सिझेरियन प्रसूतीनंतर 6 आठवड्यांनी शारीरिक संबंध ठेवले जाऊ शकतात.

प्रसूतीनंतर 6-12 महिन्यांनी वजन कमी करण्याचा विचार करा. बहुतेक स्त्रिया प्रसूतीनंतर 6 आठवड्यांच्या आत त्यांचे अर्धे वजन कमी करतात. रोजच्या व्यायामासोबत सकस आहार घेतल्यास वजन कमी होण्यास मदत होईल. पण धावणे, कठोर व्यायाम करणे आणि घाईघाईने पायऱ्या चढणे पूर्णपणे टाळावे. (इथं दिलेली माहिती तज्ज्ञांशी केलेल्या चर्चेवर आधारित आहे. ही एक सामान्य माहिती आहे. कोणताही व्यक्तीगत सल्ला नाही. कोणतीही कृती करण्याआधी याबद्दल डॉक्टर किंवा तज्ज्ञांचा सल्ला घ्यावा. संबंधित माहितीसाठी न्यूज18 मराठी जबाबदार नसेल.)