Kolhapuri Mutton: धुळवडीला बनवा अस्सल कोल्हापुरी मटण! रेसिपी अशी की बोटं चाटत बसाल!

होळीला पोळी झाली की धुळवडीला नळीचा बेत ठरलेला असतो. धुळवड खेळून झाली की अनेकजण मटणावर ताव मारतात. यंदा धुळवडीसोबत 3 दिवस सुट्ट्या आल्या आहेत. त्यामुळे अनेकांचा उत्साह शिगेला आहे. कुटुंबासोबत धुळवड एन्जॉय करायची असेल तर अगदी कोल्हापुरी स्टाईलचं मटण घरच्या घरी बनवू शकता.

घरच्या घरी अर्धा किलोचं कोल्हापूर स्टाईल मटन बनवण्यासाठी अगदी घरातलंच साहित्य लागतं. यात अर्धा किलो मटन, 2 चमचे तेल, 2 बारीक चिरलेले कांदे, 6-7 पाकळ्या लसूण, आल्याचा तुकडा, 2 बारीक चिरलेले टोमॅटो, अर्धा चमचा हळद, चमचा मिरची पावडर, 1 चमचा धने पावडर, अर्धा चमचा जिरे पावडर आणि 1 चमचा गरम मसाला या साहित्यात झणझणीत कोल्हापुरी मटण बनवू शकता.

यासोबतच कोल्हापुरी मसाला (स्वतः बनवलेला किंवा विकत घेतलेला) - 2-3 चमचे, तिखट मसाला (ज्यांना तिखट आवडते, ते वाढवू शकतात), मीठ – चवीप्रमाणे, कोथिंबीर आणि 1 कप पाणी एवढ्यात आपली रेसिपी तयार होईल.

कोल्हापुरी मसाला बनवण्यासाठी दालचिनी - 1 इंच तुकडा, लवंग - 2-3, वेलची – 2, काळी मिरी - 5-6, तिळ - 1 चमचा, सुकं नारळ - 1/4 कप, गरम मसाला - 1/2 चमचा, धने - 1 चमचा, जिरे - 1 चमचा, कोथिंबीर - 1 चमचा पेस्ट लागेल. कोल्हापुरी मसाला बनवताना सर्व मसाले एकत्र करून मिक्सरमध्ये पावडर करा.

मटण बनवण्यासाठी अर्धा किलो मटण साफ धुऊन घ्या. कोल्हापुरी मसाल्याची पावडर तयार करा. त्यानंतर एका पातेल्यात तेल गरम करा. त्यात बारीक चिरलेला कांदा घाला आणि तपकिरी रंग होईपर्यंत परतून घ्या. त्यात आलं-लसूण पेस्ट घालून चांगलं परता.

टोमॅटो घालून त्यांना सुद्धा चांगलं परता. हळद, मिरची पावडर, धने पावडर, जिरे पावडर आणि कोल्हापुरी मसाला घाला आणि सर्व मसाले परतून घ्या. त्यात मटण घालून, 5-10 मिनिटं भाजून घ्या. मसाला मटणावर चांगला लागेल.

मटणावर पाणी घालून, मीठ घाला आणि झाकण ठेऊन मटण पूर्णपणे उकडून घ्या. साधारण 30-40 मिनिटं मध्यम आचेवर मटण उकडायला ठेवा. त्यानंतर तुमचं झणझणीत कोल्हापुरी मटण तयार होईल. मस्तपैकी कोथिंबीर घालून त्यावर ताव मारू शकता.