भाजून घेतलेले हरभरे अन् लाल तिखट, गावाकडची झणझणीत आमटी, अगदी सोपी रेसिपी

सध्या मार्केटमध्ये ओले हरभरे आलेले आहेत. ओल्या हरभऱ्यापासून अनेक पदार्थ बनवले जाते. त्यातीलच एक पदार्थ म्हणजे ओल्या हरभऱ्याची आमटी. ही आमटी अगदी कमीत कमी वेळात तयार होते. त्याचबरोबर खायला सुद्धा खूप टेस्टी लागते.

ही आमटी दोन प्रकारे बनवता येते. काही जण कच्चा हरभऱ्याची आमटी बनवतात तर काही जण हरभरे भाजून आमटी बनवतात. आपण हरभरे भाजून आमटी कशी बनवायची? याची रेसिपी अमरावतीमधील गृहिणी सारिका पापडकर यांनी सांगितली आहे.

ओल्या हरभऱ्याची आमटी बनवण्यासाठी लागणारे साहित्य : भाजून घेतलेले हरभरे, कांदा, टोमॅटो, कोथिंबीर, हिरवी मिरची, कडीपत्ता, लसूण पेस्ट, जिरे, लाल तिखट, हळद आणि मीठ हे साहित्य लागेल.

ओल्या हरभऱ्याची आमटी बनवण्याची कृती : सर्वात आधी हरभरे, हिरवी मिरची आणि कडीपत्ता हे मिक्सर मधून बारीक करून घ्यायचं आहे. बारीक करताना यात थोडे पाणी टाकून बारीक करायचे आहे. त्यामुळे मिश्रण एकसारखे बारीक होईल. बारीक करून घेतल्यानंतर ते बाजूला ठेवून आमटीसाठी मसाला तयार करून घ्यायचा आहे.

त्यासाठी सर्वात आधी कढईत तेल टाकून घ्यायचे. तेल गरम झाले की जिरे टाकून घ्यायचे. त्यानंतर कांदा टाकायचा. कांदा लाल होई पर्यंत शिजवून घ्यायचा आहे. कांदा लालसर झाला की त्यात लाल तिखट आणि इतर मसाले टाकायचे. ते मसाले 5 मिनिट शिजवून घ्यायचे आहे. त्यानंतर त्यात टोमॅटो टाकून घ्यावा. टोमॅटो व्यवस्थित मिक्स करून नरम होईपर्यंत शिजवून घ्यायचे आहे.

टोमॅटो नरम झाले की त्यात बारीक केलेले हरभऱ्याचे वाटण टाकून घ्यायचे आहे. या वाटणात थोडे पाणी टाकून पातळ करून घ्यायचं आहे. तुम्हाला पाहिजे तेवढं पातळ हे वाटण तुम्ही करू शकता.

ते वाटण मसाल्यात व्यवस्थित मिक्स करून त्याला उकळी काढून घ्यायची आहे. आमटीला छान उकळी आली की खाण्यासाठी तयार आहे. त्यात थोडी कोथिंबीर टाकून आमटी तुम्ही भाकर आणि भात दोन्ही सोबत खाऊ शकता.