मुलं शिकावीत म्हणून ऊसतोड कामगार एकत्र, शाळेसाठी केली मोठी गोष्ट!

शाळा टिकली पाहिजे आणि पोरं शिकली पाहिजेत म्हणत <a href="https://news18marathi.com/maharashtra/beed/">बीड</a> जिल्ह्यातील ऊसतोड मजुरांनी आदर्शवत निर्णय घेतला आहे. ऊसतोड मजुरी करून उदरनिर्वाह करणाऱ्या कारेगव्हाण येथील गावकऱ्यांनी गावातील जिल्हा परिषद शाळेला मोठा निधी दिला आहे.

शाळेचं रुपडं बदलून मुलांना दर्जेदार शिक्षण मिळावं यासाठी गावकऱ्यांनी 1 लाख 35 हजारांचा निधी शाळेला सुपूर्द केला. या निधीतून शाळेच्या विकासाची कामे होणार आहेत.

बीडमधील कारेगव्हाण हे 2 हजार लोकवसतीचं गाव आहे. ऊसतोड मजुरांचं गाव अशीच गावाची ओळख आहे. येथील गावकरी वर्षातील सहा महिने ऊसतोडीसाठी गावाबाहेर राज्यात आणि परराज्यात जातात. आलेल्या पैशातून वर्षभराची रोजीरोटी चालते.

परंतु, या सगळ्यात मुलांच्या शिक्षणाचं नुकसान होतं. गावात जिल्हा परिषदेची शाळा आहे. पण निधीअभावी शाळेत पुरेशा सोयीसुविधा उपलब्ध नसल्याचे चित्र होते. त्यामुळे मुलांच्या शिक्षणात अडचणी येत होत्या.

कारेगव्हाणच्या शाळेत मे 2023 मध्ये विकास परदेशी गुरुजी रूजू झाले. त्यांनी गावकऱ्यांसोबत बैठक घेतली आणि शाळेच्या स्थितीबाबत माहिती दिली. यावर ऊसतोड मजूर असणाऱ्या गावकऱ्यांनी एकत्र येत शाळेचं रूपडं पालटण्याचा संकल्प केला. गावकऱ्यांनी एकत्र येत आपआपल्या परीने शाळेसाठी निधी गोळा केला. सगळ्यांच्या प्रयत्नातून 1 लाख 35 हजार रुपयांचा निधी गोळा झाला.

गावकऱ्यांनी केलेल्या मदतीतून शाळेच्या विकासाची कामे करण्यात येणार असून शाळा स्मार्ट बनवण्याचा प्रयत्न होणार आहे. शाळेला सुरक्षा भिंत बांधण्यात येणार आहे. तसेच विद्यार्थ्यांसाठी भौतिक सुविधा उपलब्ध करून देण्यात येणार आहेत.

विद्यार्थ्यांची शैक्षणिक गुणवत्ता वाढवण्यासाठी आवश्यक साहित्य खरेदी करण्यात येणार आहे. आपल्या मुलांच्या भविष्याचा विचार करून ऊसतोड मजुरांनी शाळेसाठी दिलेलं योगदान अनेकांसाठी नवा आदर्श ठरणारं आहे.