Weather Alert: मराठवाड्यात पुन्हा पावसाचं धुमशान, 72 तास महत्त्वाचे, हवामान विभागाचा अलर्ट

मागील आठवडाभर महाराष्ट्रभर पावसाने हाहाकार माजवला होता. अनेक ठिकाणी महापुराची स्थिती निर्माण झाली होती. शेतकऱ्यांची पिके पाण्यात बुडून गेल्याने मोठ्या प्रमाणात नुकसान झाले. नद्यांना पूर आला, रस्ते वाहून गेले, आणि जनजीवन विस्कळीत झाले. आता मात्र हवामानात मोठे बदल जाणवत आहेत. मराठवाड्यातील आजचा हवामान अंदाज जाणून घेऊ.

गेल्या तीन दिवसांपासून मराठवाड्यातील हवामानात मोठे बदल जाणवत आहेत. मुसळधार पावसानंतर आता अनेक जिल्ह्यांत पावसाचा जोर काहीसा कमी झाला आहे. भारतीय हवामान विभागाकडून (IMD) मिळालेल्या माहितीनुसार, आज, 2 ऑक्टोबर रोजी मराठवाड्यातील चार जिल्ह्यांत पुन्हा पावसाची शक्यता असून यलो अलर्ट देण्यात आला आहे.

विजयादशीच्या दिवशी परभणी, हिंगोली, नांदेड आणि लातूर या चार जिल्ह्यांना पावसाचा यलो अलर्ट जारी करण्यात आला आहे. या जिल्ह्यातील काही भागात ताशी 30 ते 40 किलोमीटर वेगाने वारे वाहत मुसळधार पाऊस पडण्याची शक्यता आहे. प्रशासनाने शेतकऱ्यांना आणि नागरिकांना सतर्कतेचा इशारा दिला असून नदी काठावरील गावांना सावधगिरी बाळगणे गरजेचे आहे.

मराठवाड्यातील उर्वरित छत्रपती संभाजीनगर, बीड, जालना आणि धाराशिव या जिल्ह्यांत ढगाळ हवामान राहील. या ठिकाणी हलक्या ते मध्यम पावसाची शक्यता आहे. मात्र हवामान विभागाकडून कोणताही अलर्ट जारी करण्यात आलेला नाही. त्यामुळे या जिल्ह्यांतील शेतकऱ्यांना काहीसा दिलासा मिळणार आहे.

दरम्यान, मराठवाड्यात पुढील 3 दिवस पावसाचा जोर वाढणार आहे. 2 ऑक्टोबरला 4 जिल्ह्यांना मुसळधार पावसाचा इशारा देण्यात आला असून 4 ऑक्टोबरपर्यंत मुसळधार पावसाची शक्यता आहे. या काळात छत्रपती संभाजीनगरसह आठही जिल्ह्यांत पुन्हा पावसाचा यलो अलर्ट असेल. त्यामुळे नागरिकांना योग्य ती काळजी घ्यावी लागेल.