US Attack Iran Ships: होर्मुझ सामुद्रधुनीत अमेरिकेचा स्ट्राइक, १६ जहाजांना उडवलं, इराणही संतापला, 'तेलाचा एकही थेंबही जगाला...'

जगातील २० टक्के तेल वाहतूक होणाऱ्या 'होर्मुझच्या सामुद्रधुनी' (Strait of Hormuz) जवळ अमेरिकन सैन्याने ही मोठी कारवाई केली. अमेरिकेचा दावा आहे की, इराण या भागात समुद्री सुरुंग पेरत होता. इराणचे हे कृत्य जागतिक व्यापारासाठी घातक ठरले असते. अमेरिकेने या कारवाईचे व्हिडिओ देखील पोस्ट केले आहेत. दरम्यान, डोनाल्ड ट्रम्प यांनी सोशल मीडियावर इशारा दिला आहे की, जर इराणने हे सुरुंग त्वरित हटवले नाहीत, तर अमेरिका असा हल्ला करेल जो जगाने कधीही पाहिला नसेल.

अमेरिकेच्या या कारवाईनंतर इराणने संपूर्ण जगाला वेठीस धरण्याची तयारी सुरू केली आहे. "आम्ही या भागातून होणारी सर्व तेल निर्यात रोखून धरू. आमच्या शत्रूंपर्यंत तेलाचा एक थेंबही पोहोचू देणार नाही," असा गर्भित इशारा इराणने दिला आहे. इराणच्या या निर्णयामुळे आखाती देशातून होणारा तेल पुरवठा विस्कळीत होण्याची शक्यता आहे. यामुळे भारतात पेट्रोल-डिझेलचे दर गगनाला भिडण्याची भीती व्यक्त होत आहे.

इराणच्या नेत्यांनी अमेरिकेसोबत कोणत्याही प्रकारची चर्चा करण्यास स्पष्ट नकार दिला आहे. युद्ध अमेरिकेने केले, मात्र ते आम्ही संपवणार असल्याचे इराणने म्हटले आहे. इराणकडून आखाती देशात असलेल्या अमेरिका-इस्रायलच्या लष्करी तळांवर हल्ले सुरू आहेत. अमेरिका-इस्रायलच्या रडार यंत्रणा उद्धवस्त केल्याचा दावा इराणने याआधी केला आहे.