Marathwada Rain: प्रतीक्षा संपली! 24 तास धो धो कोसळणार, मराठवाड्यातील 6 जिल्ह्यांना अलर्ट

मराठवाड्यात गेल्या काही काळात पावसाचा जोर ओसरला होता. तर कमाल तापमानाचा पारा तिशीपार गेला. आता मात्र हवामानात मोठे बदल जाणवत असून पावसाची प्रतीक्षा संपणार आहे. पुढील 24 तास विजांच्या कडकडाटासह जोरदार पावसाची शक्यता असून हवामान विभागाने 6 जिल्ह्यांना यलो अलर्ट जारी केला आहे.

गेल्या काही काळापासून मराठवाड्यात पावसाने उघडीप दिली होती. आता छत्रपती संभाजीनगर आणि जालना वगळता उर्वरित जिल्ह्यांत जोरदार पावसाची शक्यता आहे. हवामान विभागाने पुढील 24 तासांसाठी बीड, लातूर, नांदेड, परभणी, धाराशिव आणि हिंगोली या जिल्ह्यांना यलो अलर्ट जारी केला आहे.

बीड, लातूरसह 6 जिल्ह्यांत विजांच्या कडकडाटात जोरदार पावसाचा अंदाज आहे. या काळात ताशी 30 ते 40 किमी वेगाने वारे वाहतील. सोसाट्याच्या वारा आणि ढगांच्या गडगडाटात हलका ते मध्यम पावसाचा अंदाज हवामान विभागाने वर्तवला आहे.

छत्रपती संभाजी नगर आणि जालना या जिल्ह्यांना सतर्कतेचा कोणताही अलर्ट देण्यात आलेला नाही. मात्र, या दोन्ही जिल्ह्यांत हलका ते मध्यम पावसाचा अंदाज आहे. सध्या छत्रपती संभाजीनगरमधील तापमानात मोठी वाढ झाली असून पारा 34 अंशांवर गेला आहे. पुढील काही काळ हवामानाची हीच स्थिती कायम राहील.

दरम्यान, मराठवाड्यातील शेतकऱ्यांची पावसाची प्रतीक्षा संपणार असून शेतकऱ्यांना काहीसा दिलासा मिळणार आहे. परंतु, 24 तासानंतर हवामानात पुन्हा बदल होणार असून 19 जुलै रोजी लातूर आणि धाराशिव या जिल्ह्यांना यलो अलर्ट असणार आहे. उर्वरित जिल्ह्यांतील पावसाचा जोर पुन्हा कमी होण्याचा अंदाज आहे.