Weather Alert: विजा कडाडणार, 24 तास पाऊस कोसळणार, मराठवाड्यातील 4 जिल्ह्यांना अलर्ट

गेल्या काही दिवसांपासून मराठवाड्यातील हवामानात मोठे बदल जाणवत आहेत. शेतकऱ्यांची पावसाची प्रतीक्षा काही प्रमाणात संपली असून छत्रपती संभाजीनगरसह सर्वच जिल्ह्यांत तुरळक पावसाने हजेरी लावली आहे. आज पुन्हा 4 जिल्ह्यांत पावसाची शक्यता असून हवामान विभागाने 24 तासांसाठी यलो अलर्ट दिला आहे. मराठवाड्यातील आजचा हवामान अंदाज जाणून घेऊ.

मराठवाड्यातील काही भागात मंगळवारी पावसाने जोरदार हजेरी लावली. 22 जुलै रोजी मराठवाड्यातील छत्रपती संभाजीनगरसह आठही जिल्ह्यांना यलो अलर्ट जारी करण्यात आला होता. या काळात ताशी 30 ते 40 किमी वेगाने वारे वाहून काही ठिकाणी विजांसह पाऊस झाला.

आज 23 जुलै रोजी मराठवाड्यातील 4 जिल्ह्यांना यलो अलर्ट देण्यात आला आहे. जालना, परभणी, हिंगोली आणि नांदेड जिल्ह्यांत जोरदार पावसाची शक्यता आहे. या काळात ताशी 30 ते 40 किमी वेगाने वारे वाहून विजांच्या कडकडाटासह पावसाचा अंदाज आहे. पुढील 24 तासानंतर हवामानात पुन्हा बदल होण्याची शक्यता आहे.

छत्रपती संभाजीनगरसह बीड, लातूर आणि धाराशिव जिल्ह्यांत देखील आज हलक्या ते मध्यम पावसाची शक्यता आहे. परंतु, आज या जिल्ह्यांना सतर्कतेचा कोणताही इशारा देण्यात आलेला नाही. पुढील 3 दिवस हवामानाची हीच स्थिती राहणार असून त्यानंतर मात्र या जिल्ह्यांत पावसाचा जोर वाढण्याची शक्यता आहे.

दरम्यान, मराठाड्यात गेल्या काही काळापासून पावसाने विश्रांती घेतली होती. शेतकऱ्यांचा खरीप हंगाम धोक्यात आला होता. मात्र, आता पुन्हा पावसाने हजेरी लावल्याने शेतकरी काही प्रमाणात सुखावला आहे. तरीही काही जिल्ह्यातील शेतकऱ्यांची पावसाची प्रतीक्षआ कायम आहे.