Jarange Patil Rally : फॉर्च्युनर, स्कॉर्पिओ आणि महिंद्रा Thar, जरांगेंचा असा आहे गाड्यांचा ताफा PHOTOS

आजपासून मराठा आरक्षण आंदोलक मनोज जरांगे पाटील यांचा मराठवाडा दौरा सुरू होत आहे. मराठा आरक्षण जनजागृती शांतता रॅली असे या दौऱ्याला नाव देण्यात आले आहे. मनोज जरांगे पाटील आपल्या वाहानांच्या ताफ्यासह हिंगोलीमध्ये दाखल झाले आहेत, त्यांच्या वाहनांच्या ताफ्यामध्ये फॉर्च्युनर, स्कॉर्पिओ आणि महिंद्रा थार अशा वाहनांचा समावेश आहे.

आज पहिल्या दिवशी हिंगोली येथे रॅली आणि सभा होणार आहे. या सभेसाठी जरांगे पाटील यांचं हिंगोलीमध्ये आगमन झालं आहे, शहरात मनोज जरांगे पाटील यांचं भव्य असं स्वागत करण्यात आलं.

या रॅलीमध्ये मनोज जरांगे पाटील यांना दोनशे महिला स्वयंसेविका सुरक्षा देणार आहेत. काही दिवसांपूर्वी मनोज जरांगे पाटील यांचा अंतरवाली सराटीमध्ये ज्या घरात मुक्काम आहे, त्या घरावर ड्रोन घिरट्या घालताना दिसून आले होते. या सर्व पार्श्वभूमीवर जरांगे पाटील यांना सुरक्षा पुरवण्यात यावी अशी मागणी सातत्यानं करण्यात येत आहे.

मराठवाड्यातील हिंगोली, जालना, परभणी, बीड, लातूर, उस्मानाबाद, नांदेड असा हा जरांगे पाटील यांचा दौरा असणार आहे. या दौऱ्याच्या माध्यमातून मनोज जरांगे पाटील हे मराठा बांधवांशी संवाद साधणार आहेत.

मराठा समाजाला ओबीसीमधूनच आरक्षण द्यावं या मागणीवर अजूनही मनोज जरांगे पाटील ठाम आहेत, त्यांनी आरक्षणाचा प्रश्न सोडवण्यासाठी सरकारला 13 जुलैची डेडलाईन दिली आहे. डेडलाईन संपायला आता अवघे काही दिवस शिल्लक राहिले आहेत. या पार्श्वभूमीवर या दौऱ्याला महत्त्व प्राप्त झाले आहे.

दरम्यान या दौऱ्यापूर्वी शुक्रवारी रात्री उशिरा भाजप नेते अशोक चव्हाण यांनी मनोज जरांगे पाटील यांची भेट घेतली आहे. या भेटीनंतर मनोज जरांगे पाटील यांची पहिली प्रतिक्रिया समोर आली.

माझा होणारा दौरा आणि अशोक चव्हाण यांच्यासोबत झालेल्या भेटीचा काही संबंध नाही, माझा दौरा ठरल्याप्रमाणे होणार आहे, असं मनोज जरांगे पाटील यांनी म्हटलं आहे.