जुळता जुळता फाटलं! राज्यात 29 पैकी 15 जागी युती फिस्कटली, भाजप- शिंदेंमध्ये कुठे कुठे झाली फाटाफूट?

राज्यात महानगरपालिकेच्या निवडणुकीमुळे राजकीय वातावरण चांगलेच तापलेले असताना अर्ज भरण्याच्या शेवटच्या दिवशी अनेक ठिकाणी भाजप आणि शिवसेना शिंदेंच्या शिवसेनेची युती फिस्कटल्याचे समोर आले आहे. आज शेवटच्या दिवशी अनेकांना तिकीट मिळाले तर काही पदाधिकाऱ्यांना ऐनवेळी उमेदवारी नाकारण्यात आली. काही ठिकाणी निष्ठावंतांना डावलण्यात आले

दरम्यान राज्यातील ठिकठिकाणी स्थानिक पातळीवरील स्थिती लक्षात घेऊन एकनाथ शिंदे यांची शिवसेना तसेच भाजपामध्ये युती झाली आहे. तर काही ठिकाणी या दोन्ही पक्षांनी युती तोडत स्वतंत्रपणे निवडणूक लढवण्याचे ठरवले आहे. दरम्यान, राज्यात एकूण 15 ठिकाणी भाजपा आणि एकनाथ शिंदे यांच्या शिवसेनेतील युती तुटली आहे.

धुळे - भाजपाकडून सकारात्मक प्रतिसाद मिळत नसल्याने शिंदेसेना-अजित पवारांची राष्ट्रवादी यांनी एकत्र निवडणूक लढवण्याचा निर्णय घेतला आहे. भाजप स्वबळावर लढणार आहे

जालना - जालना महानगर पालिकेत भाजप स्वबळावर निवडणूक लढवणार आहे. भाजप आणि शिवसेनेच्या काही जागेवर वाद, त्यामुळे अखेर युती तुटली आहे

छत्रपती संभाजीनगर - छत्रपती संभाजीनगरमध्ये शिवसेना आणि भाजप यांच्यातील युती अखेर तुटली आहे. जागावाटपावरून गेल्या आठ दिवसांपासून सुरू असलेली धुसफूस संपुष्टात आली असून, दोन्ही पक्ष आता महापालिका निवडणूक स्वतंत्रपणे लढणार आहेत. अंतर्गत मतभेदामुळे ही चर्चा यशस्वी झाली नाही

सांगली - महापालिका निवडणुकीत महायुतीतून राष्ट्रवादी (अजित पवार) गट बाहेर पडल्यानंतर शिंदेसेनेबरोबरची जागा वाटपाची चर्चा फिस्कटली आहे. महापालिकेत भाजने शिंदेसेनेला बरोबर घेण्याचा शब्द दिला होता. मात्र ऐनवेळी युती होणार नसल्याचे स्पष्ट केले.

उल्हासनगर - उल्हासनगरमध्ये शिवसेना-भाजप युती तुटली आहे. भाजपने तटस्थ भूमिका घेत 78 जागांवर निवडणूक लढवणार असल्याचे स्पष्ट केले आहे.

नवी मुंबई - नवी मुंबईत शिंदे-भाजपची युती तुटली असून, आता दोन्ही पक्ष स्वबळावर निवडणूक लढवणार आहेत. नवी मुंबईत गणेश नाईक विरुद्ध शिंदे सेना अशी लढत होणार आहे.

मीरा भाईंदर - मीरा - भाईंदर मध्ये शिवेसेनाल कमी जागा मिळत असल्याने युती फिस्कटली आहे

अकोला - अकोल्यात भाजप आणि राष्ट्रवादी अजित पवार गटामध्ये युती झाली आहे. शिवसेना शिंदे गट स्वबळावर लढवणार आहे

अमरावती - अमरावतीत शिवसेना शिंदे गट स्वबळावर निवडणूक लढवणार आहे

नांदेड - नांदेडमध्ये भाजप स्वबळावर निवडणूक लढवणार आहे.

नाशिक - भाजपने नाशिक महानगरपालिकेसाठी स्वबळावर लढण्याचा नारा दिल्यानंतर, शिंदे गटाची शिवसेना आणि अजित पवारांची राष्ट्रवादी काँग्रेस यांनी त्यांना टक्कर देण्यासाठी युती जाहीर केली आहे.

पुणे - पुण्यात शिवसेना (एकनाथ शिंदे गट) आणि भाजपमधील समन्वय बिघडला असून युती तुटल्यात जमा असल्याचं चित्र पाहायला मिळत आहे. धंगेकर आणि पुणे भाजपच्या वादामध्ये युतीचा अक्षरश खेळखंडोबा झाला आहे.

पिंपरी चिंचवड - पिंपरी चिंचवड मध्ये भाजप, राष्ट्रवादी काँग्रेस आणि शिंदेंची शिवसेना स्वबळावर निवडणूक लढवणार आहे.