'विदर्भातील काश्मीर' पाहिलंत का? नजारा पाहाल तर पुढची ट्रिप इथंच ठरवाल!

मान्सून सुरू झाला की अनेकजण पावसाळी पर्यटनासाठी बाहेर पडतात. अनेकांची कोकणातील पर्यटनस्थळांना पसंती असते. तसेच विदर्भात समृद्ध निसर्ग संपदा असून अनेक प्रसिद्ध पर्यटनस्थळे आहेत. जिथं अनेकजण आवर्जून भेट देत असतात.

सातपुड्याच्या कुशीत वसलेलं चिखलदरा हे विदर्भातले एक थंड हवेचं ठिकाण आहे. समुद्रसपाटीपासून 3 हजार 664 फूट उंचीवर असलेल्या चिखलदऱ्याला ‘विदर्भाचं काश्मीर’ म्हणून ओळखलं जातं. वर्षा काठी येथे भारताच्या काना कोपऱ्यातून लाखो पर्यटक येथे भेट देत असतात. मात्र खरी पर्वणी पावसाळ्यात असतं.

थंड हवेचे वाहणारे झुळझुळ वारे, ढगांमधून जाणारी वाट आणि उंच कड्यावरून कोसळणारे धबधबे, कॉफी, स्ट्रॉबेरीचे मळे, पट्टेदार वाघ, अस्वल पाहत हिंडण्याची हौस भागवायची तर सातपुड्याच्या या प्रदेशात यायलाच हवं असे हे ठिकाण आहे.

सातपुड्याच्या पर्वतरांगांपैकी मेळघाट रांगेत चिखलदरा येतं. चिखलदराचा शोध 1823 मध्ये हैदराबाद रेजिमेंटमध्ये कार्यरत असलेल्या कॅप्टन रॉबिन्सन यांनी लावला. तर काही आख्यायिका महाभारताशी जोडल्या गेल्या आहेत.

पांडवांनी त्यांच्या अज्ञातवासाच्या काळात चिखलदऱ्यात वास्तव्य केले. किचकाचा वध केल्यानंतर भीमाने येथील कुंडात हात धुतले होते. किचकाचा मृतदेह भीमाने ज्या दरीत फेकला होता ती दरी सुद्धा याच कुंडाच्या शेजारी आहे. भीमाने रक्तानं माखलेले हात धुतल्यामुळे या कुंडास भीमकुंड असे नाव पडले, असेही सांगितलं जातं.

चिखलदऱ्यात अनेक मनमोहक पॉइंट आहेत जिथून सातपुड्याच्या डोंगररांगेत हिरवाईने नटलेला नजरा डोळ्याचे पारणे फेडणारा ठरतो. या पॉइंट मध्ये देवी पॉइंट, पंचबोल पॉइंट, सनसेट पॉइंट, बेळघाट पॉइंटवरून मंकी पॉइंट, लॉग पॉइंट, व्हॅलेन्टाइन पॉइंट, लेन पॉइंट, वैराट पॉइंट इत्यादींचा समावेश आहे.

चिखलदऱ्यात इतिहास प्रेमी, दुर्ग प्रेमींसाठी कायम आकर्षण ठरलेला गाविलगड हा पुरातन बहामनी किल्ला आहे. गडावरील असंख्य वास्तू इतिहासाची साक्ष देत उभ्या आहेत. गाविलगड किल्ल्यात राणी महल, बिजली दरवाजा, किल्ल्यातील उत्तरेकडील जुनी तोफ याशिवाय सक्करदरा तलाव, मछली तलाव, काला पाणी तलाव आदी आवर्जून बघण्यासारखे आहेत. किल्ला पाहण्यासाठी एक संपूर्ण दिवस लागतो.

चिखलदऱ्यामध्ये कॉफीचे उत्पादन घेतलं जातं. सोबतच स्ट्रॉबेरीही पिकते. महाबळेश्वर इथली स्ट्रॉबेरी प्रसिद्ध आहेच; पण चिखलदऱ्याची स्ट्रॉबेरीसुद्धा त्याच तोडीची चवदार आहे. त्यामुळे या बागा पाहणंही पर्यटकांसाठी एक चांगला अनुभव असतो.

चिखलदऱ्यामध्ये गाडी मार्गाने येण्यासाठी राष्‍ट्रीय महामार्ग क्र. 6 वर अमरावती हे शहर आहे. तेथून चिखलदरा हे 94 किमी अंतरावर आहे. चिखलदरा येथे येण्यासाठी थेट एसटी सेवा आहे. तर रेल्वेने यायचे झाल्यास मुंबई-हावडा या मुख्य रेल्वे मार्गावर बडनेरा रेल्वे स्टेशन आहे. तेथून अमरावतीसाठी एस.टी.किंवा खाजगी वाहन सहज उपलब्ध होते.