पुणे अहिल्यानगर हायवेवर विचित्र अपघात, आधी कियाला धडक नंतर समोर येईल त्या बाईकला चिरडत गेला टेम्पो

शिरूर/पुणे प्रतिनिधी सचिन तोडकर: पुण्यात अपघात काही थांबण्याचे नाव घेत नाही, आज पुन्हा एकदा भीषण अपघात झाला. पुणे–अहिल्यानगर हायवेवर शिरूर तालुक्यातील कासारी फाटा इथे भीषण अपघात झाला.

अहिल्यानगरवरून पुण्याकडे जात असलेल्या फुलांनी भरलेल्या पिकअप वाहनाला पाठीमागून आलेल्या टेम्पोने जोरदार धडक दिली. ही धडक इतकी जोरदार होती की या धडकेनंतर फुलांनी भरलेला पिकअप पलटी झाला.

तर टेम्पो रस्त्याच्याकडेला असलेल्या टपरी शेडमध्ये घुसला. याचदरम्यान पुण्यावरून अहिल्यानगरकडे जाणाऱ्या ‘किया’ कारलाही या टेम्पोने ठोकर दिली. तसेच दोन ते तीन दुचाकी वाहनेही टेम्पोच्या खाली दबल्याची माहिती समोर आली आहे.

या अपघातात काही प्रवासी जखमी झाल्याचे प्राथमिक माहिती असून सुदैवाने कोणतीही जीवितहानी झालेली नाही. अचानक झालेल्या या विचित्र अपघातामुळे पुणे–नगर हायवेवर वाहतूक कोंडी निर्माण झाली होती.

या अपघाताचे नेमकं कारण समजू शकलं नाही, अपघात कशामुळे झाला याचा तपास सुरू आहे. स्थानिक पोलिसांनी घटनास्थळी धाव घेत वाहतूक सुरळीत केली व घटनास्थळावरून अपघातग्रस्त वाहने हटवली.