'माझा बाप आणि भाऊ जिंकून हरले पण सक्षम मरून जिंकला' आंचलने हत्येच्या आधीपासूनच सगळं सांगितलं

त्याने प्रेम केलं किंवा तिने प्रेम केलं करु दे की ! मला सांगा त्यात तुमचं काय गेलं ? कविवर्य मंगेश पाडगावकरांची कविता आपण सगळ्यांनी ऐकली असेल. पण ही कविता समाजाला मान्य आहे का तर नाही. याचं कारण म्हणजे, प्रेमसंबंधाला विरोधातून आणखी एका तरुणाची मुलीच्या बापाने हत्या केल्याची घटना नांदेडमध्ये घडली. बापाला मुलाची जात अडवी आली आणि त्याने या तरुणाला निर्घृणपणे संपवलं. पण, दुसरीकडे त्याची प्रेयसीने आपल्या प्रियकराच्या पार्थिवाशी लग्न करून बापाच्या कृत्याला उत्तर दिलं. तिने आपल्यासोबत काय काय घडलं, हे सगळं सांगितलं.

सक्षम ताटे (वय २५) आणि आंचल मामीडवार (वय २१) या दोघांचे प्रेमसंबंध होते. आंतरजातीय प्रेमसंबंधाला आंचलच्या भावाचा आणि वडिलांचा विरोध होता. या विरोधातून आंचलच्या भावाने आणि वडिलांनी मिळून सक्षमला गोळ्या झाडून मारलं, त्याची हत्या केली. ही घटना गुरुवारी घडली.

या घटनेबद्दल आंचलने डोळ्यात पाणी आणून सगळं काही सांगितलं, '3 वर्षांपासून आमचे प्रेमसंबंध होते. पण आमचे प्रेमसंबंध हे माझे वडील गजानन मामीडवार आणि माझे दोन भाऊ हिमेश मामीडवार, साहिल मामीडवार यांनी त्याच्यावर गोळीबार करून ठार मारलं.

सक्षमवर एमपीडी पडली होती. जेलमधून सुटून आल्यावर माझ्या घरचे त्याचा गेम लावण्यावर होते, असं ते बोलते होते. मला ते धमकी देत होते, आम्ही त्याला मारून टाकणार, गोड बोलून संपवणार, नशा करून त्याला मारणार. त्याच्यावर ३ गोळ्या झाडल्या तरी त्याला काही झालं नव्हतं. तेव्हा त्याच्या डोक्यात फरशी घालून त्याला मारलं.

आमच्यात प्रेम होतं, ते माझ्या पप्पाला मंजूर नव्हतं. त्यांना सक्षमची जात मान्य नव्हती. ते मला म्हणायचे, तू दुसऱ्या कोणत्याही मुलासोबत लग्न कर, पण सक्षमसोबत करू नको' असं सांगत होते. फक्त जात हे कारण होतं, पण त्याआधी त्यांची काही दुश्मनी होती. माझे दोन्ही भाऊ आणि सक्षम हे चांगले मित्र होते.

माझी भावना आता काहीच नाही, आम्हाला न्याय मिळाला पाहिजे. आरोपींना शिक्षा झालीच पाहिजे, आरोपींना फाशीच झाली पाहिजे.

सक्षम आज नसला तरी काय झालं, आमचं प्रेम आहे ना, मी त्याचाशीच लग्न करेल. माझे घरचे त्याला मारून हरले आहे पण तो हरूनही जिंकला आहे. आणि मी त्याच्यासोबत लग्न करेल, त्याच्यासोबतच हमेशा राहिल.

माझ्यावर कुणाचीही जबरदस्ती नाही. माझं वय झालं आहे, मी माझा निर्णय घेऊ शकते. मी आता सक्षमच्या घरात राहतेय आणि इथंच राहणार आहे.

सक्षमच्या घरच्यांनी माझ्यावर सोडलं आहे, त्यामुळे मी इथंच राहणार आहे. माझी इच्छा आहे, मी त्याची बनून राहावं.  माझं वय कमी असलं तरी काही होत नाही. मला त्याच्यासोबत राहायचं होतं. माझ्यामुळे तो त्याच्या मम्मीपासून दूर झाला, पण आता मी सगळ्यांसोबत तरी राहिल.