Gas : गॅस संपल्यावर आपण बुकिंग करतो, पण अमेरिकेत सिस्टिमच वेगळी; घरी गॅस येण्याची पद्धत ऐकाल तर चक्रावून जाल

भारतात आपण साधारण 14.2 किलोच्या लोखंडी सिलिंडरवर अवलंबून असतो. मात्र, अमेरिकेतील चित्र पूर्णपणे वेगळे आहे. अमेरिकेत एलपीजीला (LPG) प्रामुख्याने 'प्रोपेन' (Propane) म्हणून ओळखले जाते. तिथे शहरांमध्ये गॅस पाइपलाइन (PNG) असली, तरी ग्रामीण आणि उपनगरीय भागांत घराच्या अंगणात किंवा घराच्या मागे एक खूप मोठा फिक्स्ड टँक बसवलेला असतो. हा टँक जमिनीच्या वर किंवा खाली कायमस्वरूपी स्थापित असतो, ज्याची क्षमता आपल्या छोट्या सिलिंडरपेक्षा कित्येक पटीने जास्त असते.

अमेरिकेत गॅस टँकबाबत दोन प्रकारची पद्धत चालते. एक तर घरमालक स्वतः तो मोठा टँक विकत घेतो किंवा गॅस कंपनीकडून तो भाड्याने घेतो. जर टँक कंपनीचा असेल, तर तुम्ही केवळ त्याच कंपनीकडून गॅस भरून घेऊ शकता. भारतातही आपण सिक्युरिटी डिपॉझिट देतो, पण अमेरिकेतील हा करार दीर्घकालीन आणि मोठ्या इन्फ्रास्ट्रक्चरवर आधारित असतो.

घरासाठी मोठी यंत्रणा असली, तरी अमेरिकेत छोटे सिलिंडरही खूप लोकप्रिय आहेत. हे सिलिंडर आपल्या घरगुती सिलिंडरपेक्षा लहान असतात. त्यांचा वापर प्रामुख्याने घराबाहेर बारबेक्यू ग्रिल (BBQ) किंवा कॅम्पिंगसाठी केला जातो. या छोट्या सिलिंडरसाठी तिथे 'एक्सचेंज प्रोग्राम' चालतो. कोणत्याही सुपरमार्केटमध्ये किंवा पेट्रोल पंपवर जाऊन तुम्ही तुमचा रिकामा छोटा सिलिंडर देऊन भरलेला सिलिंडर विकत घेऊ शकता. याची होम डिलिव्हरी भारतातल्यासारखी घरोघरी केली जात नाही.