अग्निदिव्यातून धावले शेकडो नवसकरी, या देवाच्या विवाह सोहळ्यास भक्तांची मांदियाळी

सातारा शहरापासून अवघ्या 4 किलोमीटर अंतरावरावर वेण्णा नदीच्या काठी वाढे हे गाव आहे. येथील ग्रामदैवत काळभैरवनाथ हे जागृत देवस्थान मानले जाते. दरवर्षी येथील यात्रेला मोठ्या संख्येने भाविक हजेरी लावतात.

या वाढेश्वर जोगेश्वरी देवतांची वार्षिक यात्रा मोठ्या उत्साहात पार पडली. चैत्र वद्य पंचीमीला नवस बोललेल्या भक्तांकडून भैरवनाथास आकर्षक वस्त्र परिधान करण्यात आले होते.

अग्निदिव्य तयार केलेला दिवस हा यात्रेचा मुख्य दिवस असतो. या अग्निदिव्यातून भक्त चालत जातात. हा क्षण पाहण्यासाठी हजारो भाविक वेण्णा नदीच्या काठी एकत्र आले होते.

यावेळी वेण्णा नदीच्या काठी 25 फूट लांब आणि 27 इंच रुंदीचा अग्निदिव्य तयार करण्यात आला. त्यामधून मानकरी, सेवक, ग्रामस्थ, उपवास केलेले इतर बाहेरगावचे भक्त श्रींचा जयघोष करीत चालत गेले.

सूर्यास्त होण्याआधी वाढेश्वर जोगेश्वरीचा विवाह सोहळा संपन्न झाला. पुजारी, सेवक वर्ग आणि मानकरी ग्रामस्थ यावेळी उपस्थित होते.

यंदा जिल्ह्यासह इतर जिल्ह्यातून मोठ्या संख्येने भाविकांनी वाडेश्वर आणि जोगेश्वरी विवाह सोहळ्यास उपस्थिती लावली.

पंचक्रोशीतून हजारोंच्या संख्येत भाविक काळभैरवनाथ यात्रेत सहभागी होतात. तसेच मंदिराच्या समोर आपला नवस पूर्ण करतात.