Ladki Bahin Yojana: 1500 रुपये नको गं बाई! नाशिकच्या लाडक्या बहि‍णींची योजनेतून माघार, नेमकं कारण काय?

लाडकी बहीण योजना महायुती सरकारची सर्वात लाडकी योजना आहे. या योजनेत महिलांना प्रत्येक महिन्याला 1500 रुपये खात्यावर दिले जातात. आर्थिकदृष्ट्या सक्षम करण्यासाठी हे पैसे सरकार देतं. अनेक महिलांनी हे पैसे साठवून त्यातून स्वत: चं छोटं मोठं काम सुरू केलं आहे. तर काही महिला लाडकी बहीण सोबत इतर योजनांचा देखील लाभ घेत आहेत. अशा महिलांची मात्र आता पंचाईत झाली आहे.

लाडकी बहीणच्या अर्जांची फेरतपासणी झाल्यानंतर अनेक महिलांची नाव वगळण्यात आली. नाशिकमध्ये तर महिला स्वत: माघार घ्यायला लागल्या आहेत. आतापर्यंत 1600 महिलांनी आपलं नाव काढलं आहे. या महिलांनी स्वत:हून आपली नावं कमी करायला सुरुवात केली आहे, त्यामुळे नाशिकच्या या महिलांची चर्चा सध्या सुरू आहे.

लाडक्या बहि‍णींसाठी 18 नोव्हेंबरपर्यंत EKYC प्रक्रिया पूर्ण करणं बंधनकारक आहे. ज्या महिला ही प्रक्रिया पूर्ण करणार नाहीत त्यांची नाव देखील वगळण्यात येणार आहेत. त्यामुळे ज्या महिलांना 1500 रुपयांचा हप्ता प्रत्येक महिन्याला हवा आहे त्यांनी ही प्रक्रिया पूर्ण करणं बंधनकारक आहे.

नाशिकमध्ये 5 ते 10 महिला रोज आपलं नाव या योजनेतून कमी करावं यासाठी येत आहेत. इतर सरकारी योजनांचा लाभ पूर्णपणे घेता येत नसल्याने आणि त्याची रक्कम जास्त असल्याने अनेक महिलांनी या योजनेकडे पाठ फिरवली आहे. या योजनेतून महिलांनी १५०० रुपये मिळतात तेही एक महिना उशिरा, त्यामुळे महिलांनी ही योजना सोडून दुसऱ्या सरकारी योजनांचा लाभ घेण्यासाठी ही आयडिया वापरली आहे.

लाडकी बहीण योजनेत निकषांचा विचार केला तर अडीच लाख उत्पन्नाहून अधिक नसावे, एकाच कुटुंबात दोनपेक्षा जास्त महिलांनी लाभ घेऊ नये, चारचाकी नसावी, घरातील व्यक्ती सरकारी नोकरीला नसावी यासह अनेक अटींचा सामावेश करण्यात आला आहे. अपात्र ठरलेल्या महिलांची नाव या यादीतून वगळण्यात आली आहेत.

15 लाख हून अधिक महिला नाशिकमध्ये या योजनेचा लाभ घेत होत्या. त्यापैकी 1600 महिलांनी आपली नावं वगळली आहेत, तर आणखी काही महिला नावं वगळण्याच्या तयारीमध्ये आहेत. इतर सरकारी योजनांचा लाभ मिळावा म्हणून हा सगळा खटाटोप सुरू आहे.