LPG Price Hike: बजेटपूर्वीच महागाईचा मोठा झटका! आजपासून गॅस सिलिंडर महागला; चेक करा नवे दर

केंद्रीय अर्थसंकल्प सादर होण्यापूर्वीच ग्राहकांना मोठा धक्का बसला आहे. देशभरात आजपासून एलपीजी गॅस सिलिंडरच्या दरात वाढ झाली आहे.

आज केंद्रीय अर्थसंकल्पापूर्वी, तेल विपणन कंपन्यांनी रविवारी १९ किलोच्या व्यावसायिक एलपीजी सिलिंडरच्या किमतीत ५० रुपयांची वाढ करून एलपीजी ग्राहकांना धक्का दिला आहे.

व्यावसायिक वापरासाठीच्या गॅसच्या दरात वाढ झाली असताना दुसरीकडे घरगुती एलपीजी सिलिंडरच्या किमतीत कोणताही बदल झालेला नाही आणि ते ८ एप्रिल २०२५ रोजी झालेल्या शेवटच्या किंमत बदलाच्या दरानेच उपलब्ध आहेत.

व्यावसायिक एलपीजी सिलिंडरचा वापर हॉटेल्स, रेस्टॉरंट्स, रस्त्यावरील ढाबे आणि इतर व्यावसायिक आस्थापनांमध्ये केला जातो. त्यामुळे हॉटेल्स-रेस्टोरंट्समधील खाद्य पदार्थांचे दर वाढण्याची भीती आहे.

सरकारी मालकीच्या तेल विपणन कंपन्या दर महिन्याच्या पहिल्या दिवशी एलपीजी सिलिंडरच्या किमतींमध्ये सुधारणा करतात. जानेवारीमध्ये, १९ किलोच्या व्यावसायिक एलपीजी सिलिंडरची किंमत १११ रुपयांनी वाढवण्यात आली होती.

आजच्या दरवाढीनंतर व्यावसायिक एलपीजी सिलिंडरचे दर दिल्लीत १७४०.५० रुपये, कोलकातामध्ये १८४४.५० रुपये आणि मुंबई १६९२ रुपये इतके पैसे मोजावे लागतील.

या वर्षी जानेवारी आणि फेब्रुवारीमध्ये किमती वाढवण्यात आल्या असल्या तरी, मागील कॅलेंडर वर्षाच्या नोव्हेंबर आणि डिसेंबरमध्ये त्या कमी झाल्या होत्या.