Weather Alert: ऑगस्टअखेर पावसाचा जोर, मुंबईत वारं फिरलं, कोकणात यलो अलर्ट, आजचा हवामान अंदाज

ऑगस्ट महिना शेवटाकडे जात असताना पावसाचा जोर अजूनही कायम आहे. संपूर्ण महिन्यात पावसाने कोकण, मध्य महाराष्ट्रासह विदर्भ आणि मराठवाड्यात देखील जोरदार हजेरी लावली. आज, 30 ऑगस्ट रोजी देखील काही भागात पुन्हा मुसळधार पावसाची शक्यता आहे. मुंबईसह कोकणातील हवामान अंदाज जाणून घेऊ.

ठाणे आणि नवी मुंबई परिसरातही सकाळपासून हलक्या सरी बरसत आहेत. दुपारनंतर काही ठिकाणी पावसाची तीव्रता वाढू शकते आणि जोरदार सरी कोसळू शकतात. हवामान विभागाने येथेही कोणताही मोठा अलर्ट दिलेला नाही. या भागात आजचे तापमान 24 ते 30 अंश सेल्सियस दरम्यान राहील. वारे दक्षिण-पश्चिम दिशेने मध्यम गतीने वाहतील. एकूण वातावरण आर्द्र आणि ढगाळ राहणार आहे.

मुंबईमध्ये आज रिमझिम स्वरूपाचा पाऊस दिसणार आहे. सकाळपासूनच हलक्या सरी सुरू आहेत आणि दुपारनंतर किंवा संध्याकाळच्या सुमारास काही भागांमध्ये जोरदार पावसाच्या सरी कोसळू शकतात. हवामान विभागाने मात्र मुंबईसाठी कोणताही अलर्ट दिलेला नाही. आजचे तापमान 25 अंश सेल्सियस किमान ते 31 अंश सेल्सियस कमाल असेल. पश्चिम-दक्षिण दिशेने मध्यम वेगाने वारे वाहतील. एकूणच परिस्थिती सामान्य आहे आणि शहरात पाणी साचण्यासारखी परिस्थिती नाही.

पालघर जिल्ह्यात आज हलक्या ते मध्यम स्वरूपाचा पाऊस कोसळेल. समुद्रकिनारी भागात संध्याकाळच्या सुमारास पावसाची तीव्रता वाढण्याची शक्यता आहे. हवामान विभागाने दिलेल्या माहितीनुसार आजचे तापमान 25 ते 29 अंश सेल्सियस दरम्यान राहील. समुद्रकिनारी भागात 20 ते 25 किलोमीटर प्रतितास वेगाने वारे वाहू शकतात, त्यामुळे मासेमारांनी सतर्क राहणे गरजेचे आहे.

रायगड, रत्नागिरी आणि सिंधुदुर्ग या कोकण किनारपट्टीवरील महत्त्वाच्या जिल्ह्यांना आज यलो अलर्ट देण्यात आला आहे. सकाळपासून रिमझिम स्वरूपाचा पाऊस सुरू असून दुपार आणि रात्रीच्या सुमारास मुसळधार पावसाच्या सरी कोसळतील अशी शक्यता हवामान विभागाने वर्तवली आहे. या भागांमध्ये आजचे तापमान 24 ते 29 अंश सेल्सियस दरम्यान राहील. समुद्र खवळलेला राहणार असून 25 ते 30 किलोमीटर प्रतितास वेगाने वारे वाहतील. त्यामुळे मच्छीमारांना समुद्रात न जाण्याचा सल्ला देण्यात आला आहे.