G20 Summit: बायडेन, सुनक यांच्यासह G20 नेते महात्मा गांधींच्या समाधीसमोर नतमस्तक; PM मोदींनी दिली खास भेटवस्तू

जी२० परिषदेला आलेले अमेरिकेचे राष्ट्राध्यक्ष ज्यो बायडेन, ब्रिटनचे पंतप्रधान ऋषी सुनक, ऑस्ट्रेलियाचे पंतप्रधान एंथनी अल्बानीज, कॅनडाचे पंतप्रधान जस्टिन ट्रुडो, चीनचे पंतप्रधान ली कियांग, रशियाचे परराष्ट्र मंत्री सर्गेई लावरोव आणि इतर राष्ट्राध्यक्षांनी महात्मा गांधींच्या समाधी स्थळी राजघाटावर श्रद्धांजली वाहिली.

राजघाट परिसरात येताच पंतप्रधान मोदींनी ज्यो बायडेन यांचे स्वागत केले. त्यांना खादीची भेट दिली. यावेळी पंतप्रधादान मोदींनी नेत्यांना बापू कुटीचे महत्त्व सांगितले.

बापु कुटीचे चित्र पंतप्रधान मोदींनी दाखवले. महाराष्ट्रातील वर्धा इथं सेवाग्राम आश्रमात बापु कुटी याठिकाणी १९३६ पासून १९४८ पर्यंत त्यांचे निवासस्थान होते.

फ्रान्सचे राष्ट्राध्यक्ष इम्यॅन्यूएल मॅक्रॉन यांनीही महात्मा गांधींना श्रद्धांजली वाहिली. तर इंडोनेशियाचे राष्ट्रपती जोको विडोडो हेसुद्धा राजघाटावर पोहोचले होते.

दक्षिण आफ्रिकेचे राष्ट्राध्यक्ष सिरिल रामफोसा यांनीही महात्मा गांधींच्या समाधीस्थळी येऊन श्रद्धांजली वाहिली.

ओमानचे उपपंतप्रधान असद बिन तारिक बिन तैमूर अल सईद हे राजघाटावर आले होते. पंतप्रधान मोदींनी त्यांचे स्वागत खादीची भेटवस्तू देऊन केलं. सिंगापूरचे पंतप्रधान ली सीन लूंग हेसुद्धा राजघाटावर पोहोचले होते.

युनायटेड नेशन्सचे महासचिव एंटोनियो गुटेरेस, आशियाई विकास बँकेचे प्रमुख मासात्सुगु असाकावा, जागतिक आरोग्य संघटनेचे टेड्रोस घेब्रेयेसस, जागतिक बँकेचे प्रमुख अजय बंगा, आंतरराष्ट्रीय नाणेनिधीच्या व्यवस्थापकीय संचालक क्रिस्टालिना जॉर्जिवा यांच्यासह इतर प्रतिनिधी महात्मा गांधींच्या समाधीसमोर नतमस्तक झाले.