Weather alert: सावधान! राज्यात पुढील 3 दिवस पावसाचे, या जिल्ह्यांना यलो अलर्ट

काही दिवसांच्या विश्रांतीनंतर राज्यात पुन्हा पावसाचे आगमन झाले आहे. गेले 3 दिवस राज्यातील विविध भागांत पावसाचा अलर्ट हवामान विभागाकडून देण्यात येत आहे. 7 जून रोजी देखील राज्यातील विविध भागांत पावसाची शक्यता वर्तवण्यात आली आहे. शनिवारसाठी पश्चिम महाराष्ट्र, मराठवाडा आणि विदर्भात पावसाचा यलो अलर्ट सुद्धा जारी करण्यात आला आहे. पाहुयात, 7 जून रोजी राज्यातील कोणकोणत्या भागात पावसाची शक्यता आहे.

मुंबईत 7 जून रोजी अंशतः ढगाळ आकाश राहून ढगांच्या गडगडाटासह पावसाची शक्यता वर्तवण्यात आली आहे. मुंबईसह पालघर, ठाणे, रत्नागिरी, रायगड, सिंधुदुर्ग या सर्व जिल्ह्यांत तुरळक ठिकाणी हलक्या ते मध्यम स्वरूपाच्या पावसाची शक्यता असल्याचं हवामान विभागानं सांगितलंय. या जिल्ह्यांना कोणताही अलर्ट जारी करण्यात आलेला नाही.

पुण्यात अंशतः ढगाळ आकाश राहून वादळी वाऱ्यासह मध्यम स्वरूपाचा पाऊस पडू शकतो. पुण्यासह पुणे घाटमाथा, सातारा, सातारा घाटमाथा, सांगली, सोलापूर या जिल्ह्यांतही तुरळक ठिकाणी वादळी वाऱ्यासह आणि विजांच्या कडकडाटासह हलक्या ते मध्यम स्वरूपाच्या पावसाची शक्यता हवामान विभागानं वर्तवली आहे. या सर्व जिल्ह्यांना पावसाचा यलो अलर्ट जारी करण्यात आला आहे.

कोल्हापूर घाटमाथा आणि कोल्हापूर या ठिकाणी देखील हलक्या ते मध्यम स्वरूपाच्या पावसाची शक्यता वर्तवण्यात आली आहे. मराठवाड्यातील प्रमुख शहर असलेल्या छत्रपती संभाजीनगरमध्ये 7 जून रोजी अंशतः ढगाळ आकाश राहून वादळी वाऱ्यासह मध्यम स्वरूपाचा पाऊस पडण्याची शक्यता आहे. छत्रपती संभाजीनगरसह जालना, परभणी, बीड, हिंगोली, धाराशिव या जिल्ह्यांतही वादळी वाऱ्यासह आणि विजांच्या कडकडाटासह मध्यम स्वरूपाच्या पावसाची शक्यता आहे. या जिल्ह्यांना पावसाचा यलो अलर्ट जारी करण्यात आला आहे. नांदेड आणि लातूर या दोन जिल्ह्यांतही हलक्या ते मध्यम स्वरूपाच्या पावसाची शक्यता असल्याचं हवामान विभागानं सांगितलंय.

उत्तर महाराष्ट्रातील प्रमुख शहर असलेल्या नाशिकमध्ये अंशतः ढगाळ आकाश राहून वादळी वाऱ्यासह मध्यम स्वरूपाच्या पावसाची शक्यता हवामान विभागानं वर्तवली आहे. नाशिकसह जळगाव, अहिल्यानगर या तीन जिल्ह्यातही वादळी वाऱ्यासह आणि विजांच्या कडकडाटासह पावसाची शक्यता असल्यानं पावसाचा यलो अलर्ट जारी करण्यात आला आहे.

विदर्भातील प्रमुख शहर असलेल्या नागपूरमध्ये 7 जून रोजी वादळी वाऱ्यासह आणि विजांच्या कडकडाटासह पावसाची शक्यता हवामान विभागानं वर्तवली आहे. नागपूरसह अकोला, अमरावती, भंडारा, बुलढाणा, चंद्रपूर, गडचिरोली, वर्धा या सर्व जिल्ह्यांतही वादळी वाऱ्यासह आणि विजांच्या कडकडाटासह पावसाची शक्यता आहे. या सर्व जिल्ह्यांना पावसाचा यलो अलर्ट जारी करण्यात आला आहे.

यवतमाळ, वाशिम, गोंदिया या तीन जिल्ह्यांत कुठलीही पावसाची शक्यता नाही. राज्यातील विविध भागांत पावसाची शक्यता हवामान विभागानं वर्तवली आहे. काही जिल्ह्यांना पावसाचा येलो अलर्ट जारी करण्यात आला आहे. त्यामुळे नागरिकांनी सतर्कता बाळगणे गरजेचे आहे. वादळी वारे आणि विजांच्या कडकडाट होत असताना घराबाहेर पडू नये. बाहेर असल्यास सुरक्षित ठिकाणी आसरा घ्यावा. शेतकऱ्यांनी हवामानाचा अंदाज घेऊनच शेतीची कामे करावीत, अशा सूचना वारंवार हवामान विभागाकडून देण्यात येत आहे.