पुणे महापालिकेत भाजपचं 'महिला राज', तब्बल 91 'लाडक्या बहिणी' मैदानात, कुणाकुणाला संधी? वाचा यादी

पुणे : पुणे महानगरपालिकेच्या निवडणुकीसाठी (Pune Municipal Corporation Election 2026) भाजपाकडून उमेदवारांची नावं समोर आली आहे.  या उमेदवारांना भाजपाकडून  (BJP Candidate List BMC 2026) एबी फॉर्मही देण्यात आले. यादी जाहीर झाल्यानंतर पुण्यात भाजपने एक क्लिअर मेसेज दिला आहे. पुणे महापालिकेत भाजपने जास्तीत महिलांना संधी दिली आहे. महिलांच्या सशक्तीकरणाचा मुद्दा केवळ भाषणांपुरता न ठेवता, प्रत्यक्ष निवडणुकीत अंमलात आणल्याचे भाजपच्या उमेदवारी यादीतून समोर आले आहे.

यंदा भाजपने पुण्यात सर्वाधिक महिलांना उमेदवारी देत इतिहास घडवला आहे. तब्बल 165 जागांपैकी 91 जागांवर महिलांना उमेदवारी देण्यात आली असून, हा आकडा इतर कोणत्याही पक्षाच्या तुलनेत सर्वाधिक आहे. विशेष म्हणजे केवळ महिला आरक्षित वार्डांपुरते न थांबता, सर्वसाधारण पुरुष वार्डांमध्येही भाजपने महिलांवर विश्वास दाखवत त्यांना संधी दिली आहे. सर्वसाधारण वार्डातून पुरुष उमेदवारांना वगळत तब्बल 9 महिलांना संधी देण्यात आली आहे.

भाजपच्या या निर्णयामुळे पुण्याच्या राजकीय वर्तुळात चर्चा सुरू झाली आहे. लाडकी बहीण योजनेच्या   संकल्पनेला निवडणुकीच्या मैदानात उतरवत, महिलांना नेतृत्वाची संधी देत स्पष्ट संदेश भाजपने दिला आहे. पक्षाच्या नेत्यांच्या मते, महिलांमध्ये असलेली प्रशासकीय क्षमता, समाजाशी असलेला थेट संपर्क आणि स्थानिक प्रश्नांची जाण यामुळेच हा निर्णय घेण्यात आला आहे.

पुणे शहरात शिक्षण, आयटी, उद्योग आणि सामाजिक चळवळींचा मोठा वारसा आहे. या पार्श्वभूमीवर महिलांचे प्रतिनिधित्व वाढवणे ही काळाची गरज असल्याने भाजपने हा निर्णय घेतल्याचे समोर आले आहे. त्यामुळेच यंदाच्या निवडणुकीत महिलांना केवळ प्रतिनिधित्वच नव्हे, तर निर्णायक भूमिका देण्याचा प्रयत्न असल्याचे स्पष्ट होते.

भाजपने जाहीर केलेल्या यादीत सर्वसाधारण वार्डातून संधी मिळालेल्या नऊ महिला शिलेदारांची सध्या राजकीय वर्तुळात सुरू आहे. या महिला उमेदवारांनी विविध सामाजिक, राजकीय आणि संघटनात्मक पातळीवर काम केल्याचा दावा पक्षाकडून करण्यात येत आहे. त्यामुळे या महिलांकडून निवडणुकीत दमदार कामगिरीची अपेक्षा व्यक्त केली जात आहे. एकूणच, यंदाच्या पुणे महापालिका निवडणुकीत महिलांना सर्वाधिक संधी देणारा भाजप हा एकमेव पक्ष ठरला असून, या निर्णयाचा निवडणूक निकालावर काय परिणाम होतो, याकडे संपूर्ण राज्याचे लक्ष लागले आहे.