Weather Alert : पुढील 3 दिवस धोक्याचे! महाराष्ट्रावर पुन्हा अस्मानी संकट; 10 जिल्ह्यांना अलर्ट

दक्षिण कोकण, दक्षिण मध्य महाराष्ट्र आणि मराठवाड्यातील काही जिल्ह्यांमध्ये विजांच्या कडकडाटासह आणि वादळी वाऱ्यासह मध्यम पावसाची शक्यता भारतीय हवामान शास्त्र विभागाने वर्तवली आहे. राज्यातील एकूण 10 जिल्ह्यांना हवामान विभागाने 8 ऑक्टोबर रोजीसाठी यलो अलर्ट जारी केला आहे. पाहुयात 8 ऑक्टोबर रोजी राज्यामध्ये हवामानाची स्थिती कशी असेल.

मागील दोन दिवसांपासून राज्यात कमाल तापमानात घट झाल्याचं पहायला मिळत आहे. मुंबई शहर आणि उपनगरात सामान्यतः ढगाळ आकाशासह हलक्या ते मध्यम पावसाची शक्यता आहे. तर कोकण विभागातील रत्नागिरी, सिंधुदुर्ग जिल्ह्याला जोरदार पावसाचा इशारा हवामान विभागाने दिला आहे. या दोन्ही जिल्ह्यांना हवामान विभागाने यलो अलर्ट जारी केला आहे.

पश्चिम महाराष्ट्रातील सातारा, सांगली, कोल्हापूर आणि सोलापूर या चार जिल्ह्यांना हवामान विभागाने यलो अलर्ट जारी केला आहे. तर पुणे जिल्ह्यातही हलक्या ते मध्यम पावसाची शक्यता वर्तवली आहे.

उत्तर महाराष्ट्रातील कोणत्याही जिल्ह्याला हवामान विभागाने अलर्ट दिलेला नाही. परंतु उत्तर महाराष्ट्रातील अहिल्यानगर, नाशिक, धुळे, नंदुरबार, जळगाव या सर्व पाचही जिल्ह्यांमध्ये विजांच्या कडकडाटासह आणि ताशी 30 ते 40 किमी वेगाने वारे वाहून हलक्या ते मध्यम पावसाची शक्यता आहे.

मराठवाड्याच्या अनेक जिल्ह्यांमध्ये पुन्हा एकदा पावसाने जोरदार हजेरी लावण्याचे पाहायला मिळालं. 8 ऑक्टोबर रोजीसाठी देखील धाराशिव आणि लातूर या दोन जिल्ह्यांना यलो अलर्ट जारी करण्यात आला आहे. तर उर्वरित जिल्ह्यांमध्ये हलक्या ते मध्यम पावसाची शक्यता हवामान विभागाने वर्तवली आहे.

पूर्व विदर्भातील गडचिरोली आणि चंद्रपूर या जिल्ह्यांना हवामान विभागाने यलो अलर्ट जारी केला आहे. या दोन जिल्ह्यात विजांच्या कडकडाटासह जोरदार पावसाची शक्यता आहे. तर विदर्भातील उर्वरित जिल्ह्यांमध्ये हलक्या ते मध्यम पावसाची शक्यता हवामान विभागाने वर्तवली आहे.

दरम्यान मागील दोन ते तीन दिवसांपासून राज्यातील कमाल तापमानात घट झाल्याचे पाहायला मिळत आहे. शक्ती चक्रीवादळाच्या प्रभावामुळे राज्यातील अनेक जिल्ह्यांमध्ये मध्यम ते जोरदार पाऊस होत असल्याचे पाहायला मिळत आहे. 10 ऑक्टोबर पर्यंत राज्यामध्ये हा पाऊस सक्रिय राहण्याची शक्यता हवामान विभागाने वर्तवली आहे.