Weather Alert : महाराष्ट्रातून पावसाची एक्झिट नाहीच! मंगळवारी वादळी कमबॅक, 13 जिल्ह्यांना अलर्ट

राज्यात ऑक्टोबरच्या पहिल्या आठवड्यात तुरळक ठिकाणी पावसाने हजेरी लावली. हवामान खात्याने दिलेल्या अंदाजानुसार 7 ऑक्टोबर रोजीही राज्यातील अनेक जिल्ह्यांमध्ये वादळी वाऱ्यासह आणि विजांच्या कडकडाटासह पावसाची शक्यता व्यक्त करण्यात आली आहे. त्यामुळे राज्यातील 13 जिल्ह्यांना यलो अलर्ट जारी करण्यात आला आहे. पाहुयात 7 ऑक्टोबर रोजी राज्यातील हवामानाची स्थिती कशी राहील.

कोकण विभागातील पालघर आणि ठाणे जिल्ह्यांमध्ये विजांच्या कडकडाटासह वादळी वाऱ्यांची शक्यता वर्तवण्यात आली आहे. त्यामुळे या दोन जिल्ह्यांना हवामान खात्याने यलो अलर्ट दिला आहे. मुंबई, रायगड, रत्नागिरी आणि सिंधुदुर्ग जिल्ह्यांत ढगांच्या गडगडाटासह हलक्या ते मध्यम स्वरूपाच्या पावसाचा अंदाज आहे. समुद्रकिनारी भागांतील नागरिकांना हवामानातील बदल लक्षात घेण्याचे आवाहन करण्यात आले आहे.

पश्चिम महाराष्ट्रातील पुणे, कोल्हापूर, सातारा, सांगली आणि सोलापूर जिल्ह्यांमध्ये हलक्या स्वरूपाच्या पावसाचा अंदाज आहे. तर घाटमाथा परिसरात काही ठिकाणी मध्यम स्वरूपाचा पाऊस होण्याची शक्यता असल्याचं हवामान विभागानं सांगितलंय.

मराठवाड्यातील छत्रपती संभाजीनगर आणि जालना जिल्ह्यांमध्ये वादळी वाऱ्यासह आणि विजांच्या कडकडाटासह पावसाची शक्यता आहे. या दोन जिल्ह्यांना यलो अलर्ट देण्यात आला आहे. तर परभणी, बीड, हिंगोली, नांदेड, लातूर आणि धाराशिव जिल्ह्यांमध्ये ढगांच्या गडगडाटासह हलक्या पावसाची शक्यता आहे.

उत्तर महाराष्ट्रातील धुळे, नंदुरबार, जळगाव आणि नाशिक जिल्ह्यांमध्ये वादळी वाऱ्यासह आणि विजांच्या कडकडाटासह हलक्या ते मध्यम स्वरूपाच्या पावसाची शक्यता आहे. नाशिक घाटमाथा परिसरात पावसाची तीव्रता किंचित वाढण्याची शक्यता आहे. या सर्व जिल्ह्यांना पावसाचा यलो अलर्ट जारी करण्यात आला आहे. अहिल्यानगर जिल्ह्यात मात्र हलक्या सरींचा अंदाज नोंदवण्यात आला आहे.

विदर्भातील अकोला, अमरावती, बुलढाणा, नागपूर, वर्धा, वाशिम, यवतमाळ या जिल्ह्यांत कुठलीही पावसाची शक्यता नाही. स्वच्छ सूर्यप्रकाश राहण्याची शक्यता आहे. तर भंडारा, चंद्रपूर, गडचिरोली आणि गोंदिया या जिल्ह्यांमध्ये वादळी वाऱ्यासह आणि विजांच्या कडकडाटासह पावसाचा अंदाज वर्तवण्यात आला आहे. या जिल्ह्यांना यलो अलर्ट जारी करण्यात आला आहे.

हवामान विभागाने शेतकऱ्यांना आणि नागरिकांना पुढील दोन दिवस वादळी वाऱ्यांपासून आणि विजांच्या कडकडाटापासून सावध राहण्याचा इशारा दिला आहे. शेतकऱ्यांनी उभ्या पिकांचे नुकसान टाळण्यासाठी शक्य तितक्या शेतात पाणी साचू न देण्याची खबरदारी घ्यावी. तसेच विजांचा कडकडाट सुरू असताना झाडाखाली उभे राहू नये, असा सल्ला देण्यात आला आहे.