Weather Alert: महाराष्ट्रातील अनेक जिल्ह्यांना 24 तास धोक्याचे, पावसाचा ऑरेंज अलर्ट जारी

राज्यातील पावसाचा जोर ओसरल्याचे चित्र पाहायला मिळत आहे. परंतु, मुंबई शहर आणि कोकणातील काही जिल्ह्यांमध्ये पुढील 24 तासांमध्ये मुसळधार ते अति मुसळधार पाऊस होऊ शकतो.

मुंबई आणि कोकणातील मुंबई, ठाणे, रायगड, रत्नागिरी या जिल्ह्यांना हवामान विभागाने पुढील 24 तासांसाठी ऑरेंज अलर्ट जारी केला आहे. पाहुयात 16 जुलै रोजी राज्यात हवामानाची स्थिती कशी असेल.

मुंबई शहर आणि उपनगरामध्ये 16 जुलै रोजी साधारणपणे ढगाळ आकाश राहणार असून हलका ते मध्यम पाऊस होऊ शकतो. रायगड, रत्नागिरी, सिंधुदुर्ग, ठाणे आणि पालघर जिल्ह्यांमध्येही तुरळक ठिकाणी मध्यम पावसाची शक्यता आहे.

पुणे, सातारा, सांगली, सोलापूर आणि कोल्हापूर या पश्चिम महाराष्ट्रातील जिल्ह्यांमध्येही तुरळक ठिकाणी मध्यम पावसाची शक्यता आहे.

उत्तर महाराष्ट्रातील नाशिक, जळगाव, अहिल्यानगर, नंदुरबार, धुळे येथे एक किंवा दोन ठिकाणी हलका पाऊस होऊ शकतो.

मराठवाड्यातील छत्रपती संभाजीनगर, जालना, परभणी, हिंगोली, बीड, धाराशिव, लातूर, नांदेड या जिल्ह्यांमध्ये पावसांच्या सरी कोसळण्याची शक्यता आहे.

तर विदर्भातील बुलढाणा, अकोला, नागपूर, चंद्रपूर, भंडारा, गोंदिया आणि गडचिरोली या जिल्ह्यांमध्ये जोरदार पावसाची शक्यता असून हवामान विभागाने या सहा जिल्ह्यांना यलो अलर्ट जारी केला आहे. विदर्भातील उर्वरित जिल्ह्यांमध्ये तुरळक ठिकाणी हलका ते मध्यम पाऊस होऊ शकतो.