Weather Alert: रविवारी हवामानात मोठे बदल, सोलापूरचा पारा चढला, पुण्याला यलो अलर्ट

दक्षिण राजस्थान परिसरावर ठळक कमी दाबाचे क्षेत्र सक्रिय आहे. या कमी दाब क्षेत्रामुळे महाराष्ट्रात पावसास पोषक हवामान तयार झाले आहे. त्यामुळे कोकण, घाटमाथा आणि उत्तर महाराष्ट्रात पावसाचा जोर आहे. आज 7 सप्टेंबर रोजी उत्तर कोकण आणि उत्तर महाराष्ट्रात मुसळधार पावसाची शक्यता आहे. तर पश्चिम महाराष्ट्रासह उर्वरीत राज्यात मुख्यतः उघडिपीसह पावसाच्या हलक्या सरींचा अंदाज कायम आहे.

सातारा जिल्ह्यात शनिवारी 2 मिलीमीटर पावसाची नोंद झाली. पुढील 24 तासात साताऱ्यातील कमाल तापमान 27 अंश सेल्सिअस राहिल. तसेच घाटमाथ्यासह संपूर्ण सातारा परिसरात हलक्या पावसाची शक्यता भारतीय हवामान विभागाने वर्तवली आहे.

पुणे जिल्ह्यातील शिवाजीनगर परिसरात मागील 24 तासात 0.2 मिलिमीटर पावसाची नोंद झाली. तसेच कमाल तापमानाचा पारा 27.2 अंश सेल्सिअसपर्यंत वाढला. आज पुणे घाटमाथ्यावर जोरदार पावसाची शक्‍यता असल्याने यलो अलर्ट देण्यात आला आहे. तसेच उर्वरित पुणे जिल्ह्यात हलक्या पावसाचा अंदाज आहे. यावेळी कमाल तापमानाचा पारा 28 अंशापर्यंत वाढेल.

कोल्हापूर जिल्ह्यात मागील 24 तासात 3 मिलीमीटर पावसाची नोंद झाली. यावेळी कमाल तापमान 26.8 अंश सेल्सिअस वाढले आहे. पुढील 24 तासात कमाल तापमान 27 अंशावर राहिल. तसेच कोल्हापूर जिल्ह्यात हलक्या पावसाची शक्यता हवामान विभागाने वर्तवली आहे.

सोलापूर जिल्हात मागील चार दिवसांपासून पावसाची उघडीप कायम आहे. यामुळे तापमानाचा पारा 32 पार गेला आहे. शनिवारी 32.2 अंश सेल्सिअस कमाल तापमानाची नोंद झाली. पुढील 24 तासात कमाल तापमान 31 अंशावर राहिल. तसेच जिल्ह्यात हलक्या पावसाची शक्यता कायम आहे.

गेल्या 24 तासात सांगली जिल्ह्यामध्ये 0.4 मिलिमीटर पावसाची नोंद झाली. कमाल तापमानात घट होवून 28.7 अंश सेल्सिअस नोंदवलं गेलं. तर आज हलक्या पावसासह कमाल तापमानात वाढ होण्याची शक्यता आहे. यावेळी जिल्ह्यातील कमाल तापमान 29 तर किमान तापमान 22 अंश सेल्सिअस इतके राहील.

राज्यात तुरळक ठिकाणी पावसाची शक्यता असली तरीही बहुतांश भागात कमाल तापमान वाढत आहे. राज्यात ऊन-सावल्यांसह ढगाळ वातावरण कायम आहे. उर्वरित राज्यात मुख्यतः पावसाच्या उघडिपीसह हलक्या सरींचा अंदाज आहे.