महाराष्ट्रातील या गावात गणेशोत्सव होत नाही साजरा, काय आहे कारण?

हिंदू धर्मात श्रावण महिन्यानंतर येणाऱ्या भाद्रपद अमावस्येला विशेष महत्त्व आहे. या अमावस्येला पिठोरी अमावस्या असे देखील म्हणतात. प्रत्येक भागानुसार ही अमावस्या साजरी करण्याची पद्धत वेगवेगळी आहे.

डोंबिवली नजीक वडवली गावात पिठोरी अमावस्या मोठ्या प्रमाणात साजरी केली जाते. येथील घराघरात पिठोरीची पूजा होते.

यामध्ये तेरडा, लावा, दुर्वा, करडई, हळदीची फुले, कंट्रोलीचे तण, सरड्याची काशी, केळीची पाने अशी विविध पाने या पूजेसाठी जंगलातून शोधून आणली जातात.

पुरुष नदीवर ही सर्व पाने धुतात आणि त्यानंतर त्याची आरती केली जाते. पूजा केलेली ही पाने टोपलीत ठेवून वाजत गाजत मिरवणूक काढली.

ही मिरवणूक प्रत्येकाच्या घरापर्यंत येते. आपापल्या घरी जाऊन आई, पत्नी आणि मुलांसह पुन्हा यथासांग पूजा केली जाते.

घरात पिठोरी पुजली जाते. या पूजेला पीठाने केलेल्या पदार्थाचा नैवेद्य दाखवला जातो.

विशेष म्हणजे या गावात पिठोरीकडे नवस करण्याची प्रथा आहे. आपली इच्छा पिठोरी अमावस्या पूर्ण करते अशी येथील लोकांची मान्यता आहे.

वडवली गावचं आणखी एक वैशिष्ट्य म्हणजे पिठोरी साजरी केली जात असल्याने गावात गणपतीची प्राणप्रतिष्ठा केली जात नाही.

ही अनोखी प्रथा अनेक वर्ष सुरू असून गावाची परंपरा जपत असल्याचे येथील गावकरी आणि सरपंच जितेंद्र पाटील सांगतात.