Ram Navami 2024: अयोध्येच्या राम मंदिरात पहिल्यांदाच असं घडलं, रामलल्लाच्या मूर्तीवर…Photos

या प्रोजेक्टचं नाव ‘सूर्य तिलक प्रोजेक्ट’ आहे. काउंन्सिल ऑफ सायंटिस्ट अँड इंडस्ट्रीअल रिसर्च (सीएसआयआर) - सेंट्रल बिल्डिंग रिसर्च इन्स्टिट्युट (सीबीआरआय) रुरकीतील शास्त्रज्ञ डॉ. एस. के. पाणिग्रही म्हणाले की, रामनवमीला श्रीरामाच्या मूर्तीच्या कपाळावर टिळा लावणं हा सूर्य तिलक प्रोजेक्टचा मूळ उद्देश आहे. या अंतर्गत दुपारी रामाच्या कपाळावर सूर्यप्रकाश पाडण्यात आला.

डॉ. पाणिग्रही म्हणाले, ‘या प्रोजेक्टअंतर्गत दरवर्षी चैत्र महिन्यात रामनवमीच्या दिवशी दुपारी 12 वाजल्यापासून रामाच्या कपाळावर सूर्यप्रकाशाचा टिळा लावला जाईल. दरवर्षी या दिवशी सूर्याची आकाशातील स्थिती बदलते. तपशीलवार गणनातून असं निदर्शनास येतं की, दर 19 वर्षांनी रामनवमीच्या तारखेची पुनरावृत्ती होते.

सीएसआयआर-सीबीआरआय रुरकी येथील वरिष्ठ शास्त्रज्ञांच्या मते, नियोजित टिळ्याचा आकार 58 मिमी आहे.’ त्यांनी सांगितलं की, टिळा लावण्याचा योग्य कालावधी सुमारे तीन ते साडेतीन मिनिटांचा आहे. ज्यापैकी दोन मिनिटे कपाळावर पूर्ण सूर्यप्रकाश होता.

श्री रामजन्मभूमी तीर्थ क्षेत्र ट्रस्टचे सदस्य अनिल मिश्रा म्हणाले, हा विहंगम सोहळा दाखवण्यासाठी मंदिर ट्रस्टतर्फे मंदिर परिसरात सुमारे 150 एलईडी टीव्ही बसवण्यात आले होते.

सीएसआयआर-सीबीआरआय रुरकी येथील टीमने बेंगळुरू येथील इंडियन इन्स्टिट्युट ऑफ ॲस्ट्रोफिजिक्सशी सल्लामसलत करून मंदिराच्या तिसऱ्या मजल्यावरून गर्भगृहापर्यंत सूर्यप्रकाश प्रसारित करण्याची यंत्रणा विकसित केली होती.

ऑप्टो-मेकॅनिकल सिस्टीमबद्दल अधिक माहिती देताना डॉ. पाणिग्रही म्हणाले, ‘ऑप्टो-मेकॅनिकल सिस्टीममध्ये चार आरसे आणि चार लेन्स असतात. ते टिल्टिंग तंत्र आणि पायपिंग सिस्टीममध्ये बसवलेले असतात. आरसे आणि लेन्सद्वारे सूर्यकिरण गर्भगृहाकडे वळवण्यात आली.

टिल्टिंग मेकॅनिझमसाठी अॅपर्चर असलेलं संपूर्ण आवरण मंदिराच्या वरच्या मजल्यावर ठेवण्यात आलं होतं. शेवटची लेन्स आणि आरसा पूर्वेकडे तोंड असलेल्या श्रीरामाच्या कपाळावर सूर्यकिरण केंद्रीत केले.