Devi Temple in pune : मराठा साम्राज्याच्या काळात पुण्यात बांधलं हे देवीचं मंदिर, दुसरं आहे पेशवेकालीन! खास PHOTOS

नवरात्री उत्सवाला सुरुवात झाली आहे. या नऊ दिवसांत देवीची आराधना केली जाते. असे मानले जाते की या काळात देवीचे दर्शन घेतल्याने देवी आपल्यावर प्रसन्न होऊन इच्छित फळ देते.

त्यामुळे अनेक भाविक या काळात देवीच्या दर्शनासाठी मंदिरांमध्ये भेट देतात. पुण्यातही अनेक प्राचीन देवीची मंदिरे आहेत. आज आपण पुण्यातील काही महत्त्वाची प्राचीन मंदिराविषयी जाणून घेणार आहोत.

सेनापती बापट रोडवरील चतु:श्रृंगी माता मंदिर हे शहरातील सर्वात मोठ्या आणि प्रसिद्ध मंदिरांपैकी एक. निस्सीम भक्त दुर्लभशेठ पितांबरदास महाजन यांनी मराठा राजवटीत हे मंदिर बांधले. सप्तश्रृंगी मातेला समर्पित असलेले हे मंदिर 90 फूट उंच आणि 125 फूट रुंद आहे.

जम्मूच्या वैष्णोदेवी मंदिराची प्रतिकृती असलेले देवीचे मंदिर पुण्यातही आहे. पुण्यात पिंपरी येथे हे वैष्णोदेवीचे मंदिर आहे. हे पुण्यातील सर्वात प्रसिद्ध दुर्गा माता मंदिरांपैकी एक आहे. जम्मूच्या वैष्णो देवी मंदिरासारखीच शांतता इथे अनुभवायला मिळते. खास गोष्ट म्हणजे या मंदिरात गुफाही आहे. मंदिराच्या सभामंडपात प्रवेश केल्यांनंतर गाभाऱ्याकडे जाण्यासाठी एक गुफा बनवली गेली आहे.

तांबडी देवीच्या तांबडी जोगेश्वरीचे मंदिर पुण्यातील आप्पा बळवंत चौक येथे हे मंदिर आहे. नवरात्री या मंदिरामध्ये देवीचे वेगवेगळे रूपे पाहायला मिळतात. हे मंदिर पेशवेकालीन आहे. या देवीने तांबडी राक्षसाचा वध केला होता त्यामुळे या देवीला हे नाव पडले अशी आख्यायिका सांगितली जाते.

तळजाई देवी मंदिर हे सुमारे 400 वर्षांपूर्वीचे असून पुण्याच्या इतिहासाशी घट्ट नातं सांगणारं आहे. छत्रपती शिवाजी महाराजांच्या राज्याभिषेकाच्या वेळी राजमाता जिजाबाईंनी येथे देवीचे दर्शन घेतल्याची कथा प्रसिद्ध आहे.पुण्याच्या पश्चिमेकडून दक्षिणेकडे पर्वतरांगांची सुरुवात पर्वती टेकडीपासून होते आणि याच डोंगररांगांमध्ये तळजाईचे पठार व तळजाई देवीचे मंदिर वसलेले आहे.

सारसबाग परिसरातील श्री महालक्ष्मी मंदिराची स्थापना बन्सीलाल रामनाथ अग्रवाल यांनी 1981 साली केली. या मंदिराचे वैशिष्ट्य म्हणजे येथे आदि पराशक्तीची तीन रूपे श्री महासरस्वती, श्री महालक्ष्मी आणि श्री महाकाली एकत्र विराजमान आहेत. विद्येची अधिष्ठात्री महासरस्वती, समृद्धीची अधिष्ठात्री महालक्ष्मी आणि सत्य व चैतन्याची अधिष्ठात्री महाकाली या त्रिदेवतांचे दर्शन एकाच ठिकाणी घेता येते. त्यामुळे या मंदिराला पुण्यात एक वेगळे धार्मिक आणि सांस्कृतिक महत्त्व प्राप्त झाले आहे.