रोहित शर्माने 1,298 sq ftचे लक्झरी अपार्टमेंट भाड्याने दिले; प्रत्येक महिन्याला होणार इतक्या लाखांची कमाई!

भारतीय क्रिकेट संघ सध्या दुबईत आयसीसी चॅम्पियन्स ट्रॉफी खेळत आहे. भारतीय संघाने दोन विजयासह सेमीफायलमधील स्थान निश्चित केले असून साखळी फेरीत भारताची अखेरची लढत न्यूझीलंडविरुद्ध होणार आहे.

दरम्यान टीम इंडियाचा कर्णधार रोहित शर्माबाबत एक मोठी बातमी समोर आली आहे. रोहित शर्माने मुंबईच्या लोअर परेल भागातील आपले एक आलिशान अपार्टमेंट भाड्याने दिले आहे. जानेवारी 2025 मध्ये झालेल्या या करारानुसार त्याला दरमहा 2.6 लाख रुपये भाडे मिळणार आहे. ही माहिती प्रॉपर्टी रजिस्ट्रेशनच्या कागदपत्रातून समोर आली आहे.

रोहित शर्मा आणि त्याचे वडील गुरुनाथ शर्मा यांनी मार्च 2013 मध्ये हे अपार्टमेंट 5.46 कोटींना खरेदी केले होते. सध्या या प्रॉपर्टीवर 6% रेंटल यील्ड मिळत असल्याचे स्क्वायर यार्ड्सच्या अहवालात नमूद केले आहे. लोअर परेल हा मुंबईतील एक महत्त्वाचा रहिवासी आणि व्यावसायिक परिसर असून, बांद्रा-कुर्ला कॉम्प्लेक्स (BKC) आणि नरीमन पॉइंटसारख्या व्यावसायिक केंद्रांपासून अगदी जवळ आहे.

आलिशान सुविधांनी युक्त अपार्टमेंट: रोहितचे हे अपार्टमेंट लोढा मार्कीज - द पार्क या लोढा ग्रुपच्या 7 एकरांत पसरलेल्या लक्झरी प्रोजेक्टमध्ये आहे. या अपार्टमेंटचा कार्पेट एरिया 1,298 चौरस फूट असून, त्याला दोन कार पार्किंग स्पेस देखील आहेत. येथे स्विमिंग पूल, जिम, क्लब हाऊस, मुलांसाठी खेळण्याचा एरिया आणि 24 तास सुरक्षा व्यवस्था यासारख्या सुविधांचा समावेश आहे. या लीज ट्रान्झॅक्शनसाठी 16,300 रुपये स्टॅम्प ड्युटी आणि 1,000 रुपये नोंदणी शुल्क भरावे लागले.

दुसऱ्या अपार्टमेंटवर अधिक भाडे! रोहित आणि त्याच्या वडिलांकडे त्याच कॉम्प्लेक्समध्ये आणखी एक अपार्टमेंट आहे, जे त्यांनी 2013 मध्ये 5.70 कोटींना घेतले होते. हे दुसरे अपार्टमेंट ऑक्टोबर 2024 पासून दरमहा 2.65 लाख रुपये भाड्याने दिले आहे. जे पहिल्या अपार्टमेंटपेक्षा किंचित जास्त आहे.

क्रिकेटचा ‘हिटमॅन’ आणि स्मार्ट इन्व्हेस्टर: रोहित शर्मा हा क्रिकेटच्या मैदानावर ‘हिटमॅन’ म्हणून ओळखला जातो, मात्र तो रिअल इस्टेटमध्येही हुशार गुंतवणूकदार असल्याचे दिसून येते.