माकडासारखं ओरडा आणि Government Job मिळवा; थेट विधानसभेत नोकरीची संधी

सरकारी नोकरीचं स्वप्न अनेकांचं असतं. पण सगळ्यांनात सरकारी नोकरी मिळते असं नाही. काही नोकरींसाठी तर परीक्षा द्याव्या लागतात. पण तुम्हाला फक्त माकडांचा आवाज काढता येत असेल आणि सरकारी नोकरी मिळत असेल असं सांगितलं तर...

तुम्ही कुत्रा, मांजर अशा वेगवेगळ्या प्राण्यांचे आवाज काढत असाल. तुम्हाला माकडांचाही आवाज काढता येत असेल तर तुमच्यासाठी मोठी संधी आहे. माकडाचा आवाज काढणाऱ्या सरकारी नोकरी मिळू शकते. वाचून आश्चर्य वाटलं ना?  

दिल्ली सरकार माकडांच्या आवाजाचं अनुकरण करणाऱ्यांना कामावर ठेवण्याची योजना आखत आहे. दिल्ली सार्वजनिक बांधकाम विभाग म्हणजे पीडब्ल्यूडीने एक निविदाही जारी केली आहे. सोमवार ते शनिवार 8 तासांची ड्युटी आहे. कर्मचाऱ्यांना विमा संरक्षणदेखील दिलं जाईल.

अधिकाऱ्यांचं म्हणणं आहे की विधानसभेच्या परिसरात आणि आजूबाजूला अनेक माकडे वारंवार दिसतात, ज्यामुळे आमदार, कर्मचारी आणि तिथं येणाऱ्याजाणाऱ्यांच्या सुरक्षिततेबद्दल चिंता निर्माण होते यासाठी विधानसभा परिसरात वानरांचे मोठे फोटोही लावण्यात आले होते, कारण माकड त्यांना घाबरतात. पण आता माकडं त्यांनाही घाबरत नाहीत उलट ते त्यांच्यावर बसतात.

या समस्येचं निराकरण करण्यासाठी दिल्ली पीडब्ल्यूडीने वानगराच्या आवाजाची नक्कल करू शकतील अशा कर्मचाऱ्यांना तैनात करण्यासाठी निविदा जारी केली आहे. अधिकाऱ्यांनी सांगितलं की हे कामगार माकडांना घाबरवण्यासाठी वानरदेखील आणू शकतात.