मोठे डोळे, सुळ्यासारखे दात! सेलिब्रिटीही या भयानक डॉलचे दिवाने, Labubu Dolls लोक का खरेदी करत आहेत?

आतापर्यंत टेडी बिअर लोकांच्या पसंतीस उतरलेलं सॉफ्ट टॉय. कुणीही त्याच्या प्रेमात पडावं इतका तो क्युट दिसतो. पण सध्या एका भयानक बाहुल्याने सगळ्यांना वेड लावलं आहे. मोठे डोळे, सुळ्यासारखा दात असा लबुबू डॉल. सध्या लाबुबू बाहुल्यांचा ट्रेंड आहे. भयानक दिसतो पण तरी लोक आवडीने खरेदी करत आहेत.

हे खेळणं केवळ मुलांनाच नाही तर प्रौढांनाही आकर्षित करत आहे. ते ते फॅशन अॅक्सेसरी म्हणून वापरत आहेत. याने आजकाल लक्झरी फॅशनच्या जगात खळबळ उडवून दिली आहे. अगदी सेलिब्रिटीही याचे दिवाने आहेत.

के-पॉप बँड ब्लॅकपिंक सदस्य लिसाने तिच्या लक्झरी बॅगवर लाबुबू की चेन घातलेले काही फोटो सोशल मीडियावर शेअर केले. रिहाना, किम कार्दशियन, दुआ लिपा आणि डेव्हिड बेकहॅम सारख्या अनेक आंतरराष्ट्रीय स्टार्सनीही त्यांच्या बॅगवर याचा वापर केला.

भारतीय सेलिब्रिटीही यात मागे नाहीत. बॉलीवूडच्या फॅशन वर्तुळात ती एक छान ट्रेंड बनली. अनन्या पांडे अलीकडेच तिच्या लक्झरी बॅगवर पेस्टल गुलाबी रंगाची लाबुबू की चेन घालून दिसली. फॅशन आयकॉन करण जोहरनेही त्याच्या इन्स्टाग्राम स्टोरीवर लबुबूबद्दल मजेदार पद्धतीने लिहिलं, "कोणीही यातून सुटत नाही, आपल्या सर्वांना ते हवं असतं, पण ते नेहमीच सापडत नाही. ते तुमचं हृदय धडधडायला लावू शकतं. नाही, ते प्रेम नाही, ते लबुबू...!!!"

लाबुबू ही हाँगकाँगमधील कलाकार केसिंग लंग यांनी डिझाइन केलेली एक संग्रहणीय आलिशान खेळणी आहे. त्यांनी 2015 मध्ये डिझाइन केलेलं हे विचित्र पण आकर्षक पात्र 2019 मध्ये कंपनीने जागतिक स्तरावर लाँच केलं होतं. खरं तर ते 2015 च्या 'द मॉन्स्टर' या पुस्तक मालिकेतील एक पात्र आहे. जो नॉर्डिक पौराणिक कथांपासून प्रेरित आहे. हे एक काल्पनिक, खोडकर पण दयाळू एल्फसारखे पात्र आहे ज्याचे डोळे मोठे, टोकदार कान आणि नऊ टोकदार दात असलेले हास्य असलेलं तोंड.

या बाहुल्या 10 वर्षांपूर्वी बनवल्या गेल्या आहेत. तरी अचानक जगभरात तिचा ट्रेंड वाढला आहे. याचं कारण म्हणजे चिनी कंपनी पॉप मार्ट ते अनोख्या पद्धतीने विकत आहे आणि अनेक सेलिब्रिटी या ट्रेंडी बाहुलीसोबत दिसले आहेत.

लाबुबू हे अगदी नवीन ट्रेंडी खेळणं नाही, परंतु चिनी कंपनी पॉप मार्टने ते ब्लाइंड बॉक्स स्वरूपात विकत आहे. ज्यामध्ये खरेदीदाराला आत कोणती रचना आहे हे माहित नसतं, लाबुबूच्या ब्लाइंड बॉक्स पॅकेजिंगमुळे खरेदीदाराला एक सरप्राईज फॅक्टर मिळत आहे. त्याचवेळी, टिकटॉक-इन्स्टाग्रामवरील अनबॉक्सिंग व्हिडिओ आणि कलेक्शन शोकेसमुळे त्याची लोकप्रियता आणखी वाढली, त्यामुळेही ती लोकप्रिय झाली आहे.