World's Best Handwriting : खरंच मोत्यासारखं अक्षर! व्हायरल होतंय जगातील सर्वात सुंदर हस्ताक्षर, पण आहे कुणाचं?

तुमचं हस्ताक्षर चांगलं असेल तर शाळेत शिक्षकांनी आणि इतर लोकांनीही तुमचं कौतुक केलं असेल. तुम्ही हस्ताक्षर स्पर्धेत भाग घेऊन बक्षीसही जिंकला असाल. पण एक मुलगी जिचं हस्ताक्षर इतकं सुंदर आहे की ती जगभर चर्चेत आली आहे.

हस्तलेखन हा शिक्षणाचा एक महत्त्वाचा पैलू आहे. विद्यार्थ्यांच्या चांगल्या हस्ताक्षराचे शिक्षकही कौतुक करतात. पण प्रत्येकाची हस्ताक्षराची शैली वेगळी असते. नेपाळी शाळकरी मुलीचे हस्ताक्षर जगातील सर्वात सुंदर हस्ताक्षर म्हणून गौरवण्यात आलं आहे.

प्रकृती मल्ला असं  या विद्यार्थिनीचं नाव.  तिच्या सुंदर हस्ताक्षरामुळे ती चर्चेत आहे. प्रकृती आता 16 वर्षांची आहे. नेपाळ मधील सैनिक वस्य महाविद्यालयात इयत्ता दहावीमध्ये शिकत आहे. प्रकृती मल्ला वयाच्या 14 व्या वर्षी तिच्या अप्रतिम हस्ताक्षराने सोशल मीडियावर व्हायरल झाली. तिच्या उत्कृष्ट हस्ताक्षराने जगाचं लक्ष वेधून घेतलं.

तिचं हस्ताक्षर पाहून आश्चर्यचकित झालेल्या एका व्यक्तीने लगेचच फोटो काढून सोशल मीडियावर शेअर केला. आता पुन्हा ही सही आणि हस्ताक्षर सोशल मीडियावर व्हायरल होत आहे. प्रकृती तिच्या हस्ताक्षरामुळे रातोरात जगप्रसिद्ध झाली.

नेटिझन्स या पोस्टला मोठ्या प्रमाणात लाईक आणि कमेंट करत आहेत. नेटिझन्स कमेंट करत आहेत की ते कॉम्प्युटरवर टाईप केलं आहे,  असं दिसतं आहे की ती मोती अक्षरं रचली आहेत.

प्रकृतीच्या हस्ताक्षराला नेपाळ सरकारने नेपाळमधील सर्वोत्कृष्ट कॅलिग्राफी म्हणून मान्यता दिली आहे. तिच्या अनोख्या हस्ताक्षर आणि स्वाक्षरीसाठी नेपाळमध्ये तिने अनेक पुरस्कार जिंकले आहेत.

तिचं हस्ताक्षर पाहून हस्तलेखन तज्ज्ञही आश्चर्य व्यक्त करत आहेत. तिचं हस्ताक्षर पाहिल्यानंतर तज्ज्ञांनी सांगितलं, प्रत्येक अक्षरातील अंतर समान आहे. त्यामुळे या विद्यार्थिनीचं हस्ताक्षर केवळ नेपाळमध्येच नव्हे तर संपूर्ण जगात सर्वोत्तम मानलं जातं.