रेल्वेच्या वरच्या बर्थवरून तो 'असं' काही करत होता... घाबरलेल्या मुलीने चोरून व्हिडिओ काढला; पुणे ते दिल्ली रेल्वे प्रवासातील धक्कादायक घटना

पुणे ते दिल्ली या 32 तासांच्या प्रवासात एका व्यक्तीने या तरुणीला प्रचंड अस्वस्थ केले. पीडित तरुणीने सोशल मीडियावर दिलेल्या माहितीनुसार, संबंधित व्यक्ती तिच्याच डब्यात होती आणि तो सतत तिच्याकडे एकटक पाहत होता. तो केवळ पाहतच नव्हता, तर विचित्र चेहरे करणे, अश्लील हावभाव करणे आणि तिला फोन करण्यासारखे इशारे (Phone-call gesture) करत होता. तरुणीने या व्यक्तीचा एक छोटा व्हिडिओ देखील बनवला आहे, ज्यामध्ये तो वरच्या बर्थवर लॅपटॉप घेऊन बसलेला दिसतोय आणि तिच्याकडे एकटक पाहतोय.

तरुणीने सांगितले की, मी बसलेली असो, झोपलेली असो किंवा काहीही करत असो, तो माणूस नजर हटवत नव्हता. घाबरलेल्या अवस्थेत तिने हा व्हिडिओ आपल्या आईला आणि बहिणीला पाठवला. मात्र मुलीच्या सुरक्षेची काळजी वाटल्याने आईने तिला त्या व्यक्तीकडे दुर्लक्ष करण्याचा आणि वाद न घालण्याचा सल्ला दिला. शेवटी काय करावे हे न सुचल्याने तिने हा अनुभव Reddit वर शेअर केला आणि लोकांकडे मदत मागितली.

तक्रार करण्याचा सल्ला: काही युजर्सनी तिला तात्काळ RPF (रेल्वे सुरक्षा दल) कडे तक्रार करण्यास सांगितले. तसेच X वर भारतीय रेल्वेला टॅग करून मदत मागण्याचा उपाय सुचवला. त्यांनी सांगितले की, रेल्वे अशा तक्रारींची गंभीर दखल घेते आणि पुढील स्टेशनवर तातडीने मदत पोहचवते.

या घटनेनंतर तरुणीने एक 'अपडेट' शेअर केले. जेव्हा तिला खूप अस्वस्थ वाटू लागले, तेव्हा तिने डब्यातील इतर प्रवाशांना (दोन महिला आणि दोन पुरुष) हा प्रकार सांगितला.