पर्यटकांसाठी आनंदाची बातमी, पानशेत आणि वरसगाव धरण परिसरात विशेष पर्यटन बससेवा होणार सुरू, पीएमपीएमएलचा निर्णय

पुण्याच्या पश्चिम भागात वसलेल्या पानशेत धरण आणि वरसगाव धरण परिसर हा निसर्गसौंदर्याने नटलेला, हिरवेगार डोंगर, जलाशय, धुके, धबधबे आणि शांत वातावरणासाठी प्रसिद्ध आहे. पावसाळा आणि हिवाळ्यात या ठिकाणी पर्यटकांची मोठी गर्दी होत असते. मात्र, सार्वजनिक वाहतुकीच्या मर्यादित सुविधांमुळे अनेकांना येथे जाणे जिकिरीचे ठरत होते. हीच अडचण लक्षात घेऊन पीएमपीएमएल प्रशासनाने विशेष पर्यटन बससेवा सुरू करण्याचा निर्णय घेतला आहे.

पीएमपीएमएलकडून सध्या लोणावळा, रांजणगाव गणपती, यमाई माता मंदिर, बनेश्वर मंदिर या ठिकाणी पर्यटन बस सेवा सुरू आहे. प्रवाशांचा आणि पर्यटकांचा चांगला प्रतिसाद मिळत आहे. शिवाय पानशेत आणि वरसगाव या भागात जाणाऱ्या पर्यटकांची संख्या मोठ्या प्रमाणात आहे. पीएमपीएमएलकडून या भागात बस सेवा सुरू आहे. परंतु, बस संख्या कमी असल्याने आता बस संख्या वाढविण्यात येणार आहे.