सावधान! जुनी वाहनं घेताय? सरकारी कार्यालयाचे बनावट शिक्के अन् कागदपत्रं दाखवून होतोय खेळ, पुण्यात 51 लाखांची फसवणूक

वडगाव शेरी येथील व्यावसायिक रवींद्र विठ्ठल तानवडे (५०) यांनी याप्रकरणी फिर्याद दिली आहे. पोलिसांनी दिलेल्या माहितीनुसार, संशयित आरोपी संजय नारायण पवार, सागर संजय पवार आणि सुवर्णा संजय पवार (सर्व रा. राजे शिवाजीनगर, चिखली) यांनी तानवडे यांच्याशी संपर्क साधला होता. १४ मार्च २०२३ ते २५ ऑक्टोबर २०२५ या कालावधीत हा फसवणुकीचा डाव रचण्यात आला.

आरोपींनी आपल्या मालकीच्या चार बस असल्याचे भासवून तानवडे यांचा विश्वास संपादन केला. विश्वासार्हता पटवण्यासाठी त्यांनी चक्क आरटीओचे (RTO) बनावट शिक्के मारलेली कागदपत्रे दाखवली. बस खरेदीसाठी तानवडे यांनी आरटीजीएस (RTGS) आणि रोख स्वरूपात एकूण ५१ लाख ४५ हजार रुपये दिले. मात्र, पैसे घेऊनही आरोपींनी बसचा ताबा दिला नाही. वारंवार पाठपुरावा करूनही बस न मिळाल्याने आणि पैसेही परत न मिळाल्याने आपली फसवणूक झाल्याचे तानवडे यांच्या लक्षात आले.

फिर्यादीनंतर चिखली पोलिसांनी तिघांविरुद्ध गुन्हा दाखल केला आहे. सरकारी कार्यालयाचे बनावट शिक्के आणि कागदपत्रे तयार केल्यामुळे या प्रकरणाचे गांभीर्य वाढले असून, पोलीस या रॅकेटचा अधिक तपास करत आहेत.