Pune Accident : 9 वर्षीय बहिणीला सोबत घेऊन कामावर निघालेली गरोदर महिला; पीएमपीची धडक अन् क्षणात सगळं संपलं

मृत्यू झालेल्या मुलीचे नाव सुधा बिहारीलाल वर्मा (वय ९, रा. उत्तरप्रदेश) असे आहे, तर गंभीर जखमी झालेल्या महिलेचे नाव राधा राममनोज वर्मा (वय २२, रा. तळवडे) आहे. राधाने आपल्या गरोदरपणामुळे मदतीसाठी दोन महिन्यांपूर्वीच लहान बहीण सुधाला गावाकडून बोलावून घेतले होते. राधा आणि तिचे पती एका खासगी कंपनीत कामाला आहेत. मंगळवारी दुपारी राधा जेवण करून सुधाला सोबत घेऊन पायी कामावर परतत होती. रस्ता ओलांडत असताना पीएमपीएमएलच्या एमएच. १२, एसएफ. ४४०३ क्रमांकाच्या ई-बसने त्यांना धडक दिली. या दुर्घटनेत सुधाचा जागीच मृत्यू झाला, तर राधा गंभीर जखमी झाली असून तिला तातडीने रुग्णालयात दाखल करण्यात आले आहे. सुदैवाने जखमी महिलेची प्रकृती स्थिर असल्याचे समजते.