पडक्या इमारतीत नेलं; तोंडात रूमाल कोंबून 75 वर्षीय आजीवर अत्याचार, पुण्याला हादरवणाऱ्या त्या प्रकरणात महत्त्वाचा निकाल

ही घटना सप्टेंबर २०१९ मध्ये घडली होती. पीडित ७५ वर्षीय महिला आजारी होती. याचाच फायदा घेत आरोपीने त्यांना दवाखान्यात नेण्याच्या बहाण्याने नेले. मात्र, परत येत असताना त्याने माणुसकीची सर्व सीमा ओलांडली. आरोपीने पीडितेला एका अर्धवट बांधकामाच्या ठिकाणी नेले. तिथे त्यांना जमिनीवर पाडून, तोंडात रुमाल कोंबला जेणेकरून त्या ओरडू शकणार नाहीत आणि त्यांच्यावर बळजबरीने बलात्कार केला.

अत्याचारानंतर आरोपीने पीडितेला धमकावून तिथून पळ काढला. मात्र, पीडितेने हिंमत हारली नाही. त्यांनी पायी घर गाठले आणि मुलाला सोबत घेऊन पौड पोलीस ठाण्यात तक्रार नोंदवली. झटापटीत पीडितेच्या अंगावर झालेल्या जखमा आणि वैद्यकीय तपासणीचा अहवाल या खटल्यात सर्वात महत्त्वाचा पुरावा ठरला. विशेष सरकारी वकील संजय पवार यांनी ८ साक्षीदार तपासले आणि आरोपीला जास्तीत जास्त शिक्षा देण्याची मागणी केली.

आरोपीने सध्याचे आपले वय (६५ वर्षे) आणि कुटुंबाची जबाबदारी असल्याचे सांगत दयेची याचना केली होती. मात्र, न्यायालयाने त्याचे हे दावे फेटाळून लावले. "आरोपीने ७५ वर्षीय आजारी महिलेबाबत केलेली कृती हा अत्यंत गंभीर गुन्हा आहे," असे निरीक्षण नोंदवत न्यायालयाने त्याला १० वर्षे कोठडीत ठेवण्याचे आदेश दिले.