Pune Crime : इंस्टाग्रामवर ओळख, प्रेमाच्या जाळ्यात अडकवलं अन् अल्पवयीन मुलीवर वारंवार अत्याचार, हायवेवरच्या लॉजवर घेऊन जायचा अन्...

मिळालेल्या माहितीनुसार, आरोपी वैभवने इंस्टाग्रामवरून पीडित मुलीशी संपर्क साधला होता. तिने त्याची फ्रेंड रिक्वेस्ट अक्सेप्ट केल्यानंतर त्याने तिला प्रपोज केले आणि प्रेमाचे नाटक रचलं. मुलीने सुरुवातीला स्पष्ट नकार देऊनही आरोपीने इंस्टाग्राम आणि फोनवरून तिला सतत त्रास देणं सुरूच ठेवलं. ऑगस्ट 2025 मध्ये त्याने मुलीला पहिल्यांदा मंचर येथे बोलावलं आणि तिथून आपल्या चारचाकी गाडीने पुणे-नाशिक महामार्गावरील एका लॉजवर नेलं.

जैदवाडी येथील स्काय लॉजमध्ये नेऊन आरोपीने मुलीवर पहिल्यांदा जबरदस्तीने शारीरिक संबंध ठेवले. या घटनेने मुलगी प्रचंड हादरली होती आणि भीतीपोटी तिने कोणालाही काही सांगितलं नाही. मात्र, आरोपीची हिंमत वाढल्याने त्याने पुन्हा 15 सप्टेंबर 2025 रोजी तिला खेड इथं बोलावलं आणि त्याच लॉजमध्ये नेऊन पुन्हा अत्याचार केला. एवढ्यावरच न थांबता तो तिला सोशल मीडिया आणि फोनवरून सतत फॉलो करून मानसिक त्रास देत होता.

दरम्यान, अखेर या त्रासाला कंटाळून पीडितेने आपल्या मामाच्या मदतीने खेड पोलीस ठाण्यात धाव घेतली आणि आरोपी वैभव मुसळेविरुद्ध तक्रार दाखल केली. पोलिसांनी दिलेल्या माहितीनुसार, आरोपीने पीडितेच्या अगतिकतेचा फायदा घेऊन वारंवार तिचे शोषण केले आहे. या प्रकरणी पोलिसांनी पोक्सो (POCSO) कायद्यासह बलात्काराचे गंभीर गुन्हे दाखल केले असून तपास अधिकारी आता त्या लॉजचीही चौकशी करण्याची शक्यता आहे.