दोघंही आयटी इंजिनिअर, पण लग्नानंतर पुण्यातून पोतुर्गालला गेलेला पती परतलाच नाही; 6 वर्ष पाहिली वाट, शेवटी पत्नीनं उचललं हे पाऊल

पुणे: पती-पत्नीचं नातं हे अतिशय खास आणि अनोखं असतं. एकमेकांची प्रत्येक सुख-दुःखात साथ देत ते आपला संसार पुढे नेतात. मात्र, कधीकधी लग्नानंतरही पती-पत्नीमध्ये ते खास नातं तयारच होतं नाही आणि शेवटी पर्याय उरतो, तो घटस्फोटाचा. असंच एक प्रकरण आता समोर आलं आहे. यात आधुनिक तंत्रज्ञानाच्या मदतीने पुणे कौटुंबिक न्यायालयाने एक अनोखा निकाल दिला आहे. युरोपातील पोर्तुगाल देशात नोकरीनिमित्त स्थायिक झालेला पती आणि पुण्यात राहणारी पत्नी यांचा घटस्फोट व्हिडिओ कॉन्फरन्सिंगद्वारे (VC) मंजूर करण्यात आला आहे. प्रमुख न्यायाधीश श्याम रुक्मे यांनी हा निकाल दिला . यात ६ महिन्यांचा अनिवार्य 'वेटिंग पिरीयड' देखील शिथिल करण्यात आला आहे.