Pune Gangwar: सत्या, अग्निपथ सिनेमास्टाईल आंदेकर टोळीने घेतला बदला, गणेशोत्सवात भाच्याला संपवलं!

पुण्यातील मध्यवर्ती भागात झालेल्या वनराज आंदेकरच्या हत्येला त्यांचा सख्ख्या बहिणींसोबतचा मालमत्तेचा वाद कारणीभूत ठरला होता. वनराज आंदेकर यांचं त्यांच्या दोन सख्ख्या बहिणी संजीवनी आणि कल्याणी आणि दोन सख्खे मेहुणे जयंत आणि गणेश लक्ष्मण कोमकर यांच्यासोबत बिनसलं होतं. या हत्येनंतर पोलिसांनी संजीवनी, कल्याणी या दोन सख्ख्या बहिणी आणि जयंत आणि गणेश या त्यांच्या नवऱ्यांसह सोमनाथ गायकवाड , या प्रमुख आरोपींसह 23 जणांना अटक केली होती.

पण, ४ दिवसांपूर्वी म्हणजे, १ सप्टेंबर रोजी आंदेकरच्या हत्येचा बदला घेण्यासाठी आंदेकर टोळीने एक प्लॅन रचला होता. पण या  पोलिसांनी याची कुणकुण लागली. पोलिसांनीही सगळ्यांवर नजर ठेवली आणि आंदेकर टोळीचा डाव हाणून पाडला. त्याचं घडलं असं की,  कृष्णा आंदेकरने रुमसाठी 5000 रुपये देऊन काळे याला मोहितेसोबत आंबेगाव पठार परिसरात पाठवलं होतं. त्यानंतर 30 ऑगस्ट रोजी रात्री 10 वाजता काळेनं वनराज यांचा खून करणाऱ्या आरोपींच्या घराचे रेकी केली अन् घरं पाहिली. त्याची माहिती काळेने कृष्णाला व्हॉट्सअॅप कॉलद्वारे दिली. त्या वेळी कृष्णाने अमनला पाठवतो, असं काळेला कळवलं. मात्र, अमन आला नाही. त्यामुळे दुसऱ्या दिवशी सकाळी काळेनं परत कृष्णाला वारंवार फोन केल्याचं पोलिसांच्या तपासात समोर आलं.

मात्र, पोलिसांना या प्लॅनची टीप मिळाली होती. पोलिसांनी नजर ठेवली एकाला रंगेहात पडकलं. त्यामुळे हा डाव फसला होता. पण आंदेकर टोळी कुणाला मारणार होते, हे तेव्हा कळलं नाही. पण,  ५ सप्टेंबर रोजी अखेर आंदेकर टोळीने गणेश कोमकरचा मुलगा आयुष कोमकर याची गोळ्या झाडून हत्या केली.