हडपसरमधील तरुणाचा घेतला जीव; मग हरिद्वार गाठून लॉजमध्ये राहिला, पोलिसांकडून 20 महिने शोध, पण अखेर...

५ मे २०२४ रोजी हडपसरमधील उन्नतीनगर भागातील कालव्यात विनोद मधुकर शार्दुल (वय ४५, रा. दिवा, ठाणे) नावाचा व्यक्ती बेशुद्ध अवस्थेत सापडला होता. नागरिकांनी दिलेल्या माहितीनुसार, पोलिसांनी तातडीने त्याला ससून रुग्णालयात हलवले. मात्र उपचारापूर्वीच त्यांचा मृत्यू झाला. सुरुवातीला ही अपघाती घटना वाटली असली तरी, पोलीस तपासात धक्कादायक माहिती समोर आली. किरकोळ वादातून वैभव जाधवने विनोद शार्दुल यांना कालव्यात ढकलून दिले होते. ज्यामुळे त्यांचा मृत्यू झाला. याप्रकरणी हडपसर पोलीस ठाण्यात खुनाचा गुन्हा दाखल करण्यात आला होता.

गुन्हा केल्यानंतर वैभव जाधव पुण्याबाहेर पसार झाला होता. पोलीस गेल्या दीड वर्षांपासून अधिक काळ त्याचा माग काढत होते. तांत्रिक तपास आणि गुप्त बातमीदारांकडून मिळालेल्या माहितीनुसार, तो उत्तराखंडमधील हरिद्वार येथे एका लॉजमध्ये नाव बदलून राहत असल्याचे निष्पन्न झाले. हडपसर पोलिसांचे एक पथक तातडीने हरिद्वारला रवाना झाले आणि गुरुवारी (२५ डिसेंबर) त्याला ताब्यात घेण्यात आले.