Pune News : पावसाळ्यात रस्ते बंद होण्याचे टेन्शन मिटणार, नांदेड सिटी-शिवणे दरम्यान मिळाला नवा कायमस्वरूपी मार्ग

सध्याच्या स्थितीला शिवणे-नांदेडदरम्यान असलेला पूल हा कमी उंचीचा असल्याने खडकवासला धरणातून पाणी सोडल्यावर तो बऱ्याचदा पाण्याखाली जातो. त्यामुळे हा पूल सुरक्षेच्या दृष्टीने वाहतूकीसाठी बंद करण्यात येतो. त्याचा पूर्ण परिणाम हा नागरिकांना, विद्यार्थी, कामगार तसेच दवाखाने, आयटी पार्ककडे जाणाऱ्यांना सहन करावा लागतो. ज्यात एक तास अधिक वेळ खर्चिक होतो. या वारंवार होणार्‍या समस्येवर तोडगा काढण्यासाठी नांदेड सिटी ते शिवणे दरम्यान मुठा नदीवर नवीन उंच पूल उभारण्यात येणार आहे.

नांदेड सिटीच्या मुख्य प्रवेशद्वारापासूनच्या सर्कलपासून नदीकाठी सुमारे 150 मीटर लांबीचा जोडरस्ता तयार करण्यात येणार आहे आणि त्यानंतर मूठा नदीवर साधारण 250 मीटर लांबीचा पूल उभारण्यात येईल. त्यापैंकी सुमारे 200 मीटर भाग हा मुठा नदीपात्रावर असणार आहे. ही नदी ओलाडंल्यानंतर शिवणे हद्दीत सध्या असलेल्या 18 मीटर रुंद असलेल्या जागेचा विकास करुन तो रस्ता 24 मीटर रुंद करण्यात येणार आहे.