सभागृह की आखाडा? निधीच्या वाटपावरून पुणे महानगरपालिकेत खडाजंगी, भाजप आणि काँग्रेस नेत्यांमध्ये बाचाबाची

पुणे :  पुणे महानगरपालिकेच्या सर्वसाधारण सभेत आज वादाचे केंद्र बनल्याचे पाहायला मिळाले. शहराच्या विकासकामांच्या निधीवरून सत्ताधारी भाजप आणि विरोधी पक्ष नेत्यांमध्ये झालेली अभूतपूर्व खडाजंगी चर्चेचा विषय ठरली आहे. पुणे महानगरपालिकेच्या सर्वसाधारण सभेत आज विकासकामांच्या मुद्द्यांवर चर्चा अपेक्षित असताना सत्ताधारी आणि विरोधकांमध्ये झालेल्या आरोपांमुळे आणि निधीच्या वाटपावरून प्रचंड गोंधळ उडाला.

पुणे  शहरातील विविध प्रभागांतील विकासकामांना मिळणाऱ्या निधीत भेदभाव केला जात असल्याचा आरोप करत काँग्रेसचे गटनेते अरविंद शिंदे आणि भाजपचे नेते एकमेकांसमोर उभे ठाकले. या वादाचे रूपांतर बाचाबाचीत झाल्याने सभागृहात दोन मिनिटे प्रचंड तणाव निर्माण झाला होता.

सभेच्या सुरुवातीला शहरातील रस्ते, पाणी आणि कचरा व्यवस्थापनाच्या मुद्द्यांवर चर्चा सुरू होती. मात्र, जेव्हा विषय निधी वाटपाचा आला, तेव्हा अरविंद शिंदे यांनी सत्ताधारी भाजपवर जोरदार हल्ला चढवला. विशिष्ट प्रभागांनाच निधी दिला जातोय आणि विरोधी पक्षाच्या प्रभागांना डावलले जात आहे, असा आरोप शिंदे यांनी केला. यावरून भाजपच्या नेत्यांनी आक्रमक पवित्रा घेत शिंदे यांना प्रत्युत्तर देण्यास सुरुवात केली.

हा वाद इतका विकोपाला गेला की, दोन्ही बाजूंचे नगरसेवक आपापल्या बाकावरून उठून एकमेकांवर ओरडणे आणि आक्रमक हातवारे करणे यामुळे सभागृहाचे वातावरण बिघडले. सुमारे दोन मिनिटे सर्व नगरसेवक एकमेकांसमोर उभे राहून खडाजंगी करत होते. महापौरांनी वारंवार शांततेचे आवाहन करूनही कोणीही ऐकण्याच्या मनस्थितीत नव्हते.

पुणेकर नागरिक मूलभूत सुविधांसाठी झगडत असताना, लोकप्रतिनिधींनी सभागृहात अशा प्रकारे वागणे दुर्दैवी असल्याची चर्चा आता शहरात सुरू आहे. सत्तेच्या आणि निधीच्या वादात पुण्याचे महत्त्वाचे विकास प्रकल्प बाजूला पडतात की काय, अशी भीती व्यक्त केली जात आहे.