PMPML Bus: सार्वजनिक वाहतुकीचा कायापालट! पुणेकरांचा प्रवास सुसह्य होणार, PMPबाबत प्रशासनाचा मोठा निर्णय

पुणे : पुणे आणि पिंपरी-चिंचवडकरांची जीवनवाहिनी असलेल्या 'पुणे महानगर परिवहन महामंडळाला' (पीएमपी) आर्थिकदृष्ट्या सक्षम करण्यासाठी प्रशासनाने कंबर कसली आहे. नवीन वर्षात प्रवाशांना अधिक वेगवान आणि सुरक्षित सेवा देण्यासोबतच, दैनंदिन महसूल ४ कोटी रुपयांपर्यंत नेण्याचे उद्दिष्ट निश्चित करण्यात आले आहे. पीएमपीचे अध्यक्ष तथा व्यवस्थापकीय संचालक पंकज देवरे यांनी या महत्त्वाकांक्षी योजनेची माहिती दिली. शहराचा वाढता विस्तार आणि वाढती लोकसंख्या पाहता सध्या ताफ्यात असलेल्या बसची संख्या अत्यंत तोकडी आहे, ज्याचा परिणाम बसच्या फेऱ्यांवर आणि पर्यायाने उत्पन्नावर होत आहे. ही उणीव भरून काढण्यासाठी मार्च २०२६ पर्यंत ताफ्यात मोठ्या प्रमाणावर नवीन बसेस दाखल केल्या जाणार आहेत.