100 हून अधिक दुर्गरक्षक एकत्र आले अन् उभारलं छत्रपती शिवरायांचं अनोखं स्मारक, Video

पुण्यातील सह्याद्री प्रतिष्ठाण हे गेली 12 वर्षांपासून दुर्गसंवर्धनाच काम करत आहे. छत्रपती शिवाजी महाराज आणि हिंदवी स्वराज्याचा इतिहास पुढील पिढ्यांपर्यंत पोहोचवण्यासाठी या संस्थेनं दुर्ग संवर्धनाचं काम सुरू केलं. आतापर्यंत 900 हून अधिक दुर्ग संवर्धन मोहिमा महाराष्ट्रातील विविध किल्ल्यांवर राबविल्या आहेत. तसेच हे काम पुढेही सुरूच राहणार असल्याचं दुर्गसेवक स्वप्निल काळभोर यांनी दिली.

छत्रपती शिवरायांची राजमुद्रा ही खऱ्या अर्थानं स्वराज्याचं प्रतिक होती. त्यामुळे सह्याद्री प्रतिष्ठानच्या वतीने भीमाशंकर जवळील भोरगिरी किल्ल्यावर अनोखं स्मारक उभारण्यात आलंय. 100 हून अधिक दुर्गसेवकांनी एकत्र येत किल्ल्यावर एक भव्य राजमुद्रा नेली. 9 फूट बाय 8 फुटाच्या या भव्य राजमुद्रेचं स्मारक किल्ल्यावर उभारण्यात आलंय. किमान 40 वर्षे टिकेल अशा पद्धतीनं याची उभारणी करण्यात आल्याचे सह्याद्री प्रतिष्ठानचे दुर्गसेवक काळभोर यांनी सांगितले.

भोरगिरी प्रमाणेच राज्यातील 111 किल्ल्यांवर राजमुद्रा स्थापन करण्यात येणार आहे. छत्रपती शिवाजी महाराजांनी आपल्याला जे वैभव दिलं त्याचं जतन करून तो वारसा पुढच्या पिढीला देण्याचा प्रयत्न असल्याचेही दुर्गसेवकांनी सांगितले.